Tökur á bandarísku hasarmyndinni Fast 8 munu að stórum hluta fara fram á Akranesi í vor. Þetta var tilkynnt á þorrablóti Skagamanna um síðustu helgi. Upptökur munu fara fram á svæðinu í kringum hafnarsvæðið og sementsverksmiðjuna þar í bæ.

Það er Universal Studios sem framleiðir myndina og samkvæmt Truenorth, sem er umboðsaðili Universal hér á landi, mun fjölmennt lið tækni- og upptökufólks koma hingað til lands vegna verkefnisins.

Vin Diesel. Leikur eitt aðalhlutverkið í Fast and Furious myndunum

Undirbúningur vegna verkefnisins hefst í mars og mun taka um tvær til þrjár vikur. Gert er ráð fyrir að um 80 bifreiðar verði fluttur til landsins, auk annars tækjabúnaðar. Áætlað er að tökur hefjist svo 4. apríl næstkomandi.

Á vef Skessuhorns staðfestir Regína Ásvaldsdóttir, bæjarstjóri á Akranesi, að tökur muni hefjast á Akranesi í vor. Hún segist fagna því að Truenorth hafi sett sér það markmið að eiga sem mest viðskipti við heimafólk.

„Verkefnið mun þannig hafa áhrif á veitingahús á Akranesi og ýmsa verslun og þjónustu,“ segir Regína.

Fram kemur að Akraneskaupstaður muni leigja fyrirtækinu aðstöðu á meðan á undirbúningi og tökum stendur. Þá segir einnig að fulltrúar skipulags- og umhverfissviðs Akraneskaupstaðar hafa farið með fulltrúum Truenorth í gegnum ýmis tæknileg atriði sem snúa að notkun á Sementsreitnum og á næstunni er von á leikstjóra myndarinnar til að taka svæðið endanlega út.

Fast 8 er hluti af Fast and Furious myndunum sem hafa verið gríðarlega vinsælar síðustu ár en Furious 7 er einn tekjuhæsta kvikmynd allra tíma. Á meðal þeirra stjarna sem leikið hafa í myndunum má nefna Vin Diesel, Dwayne „The Rock“ Johnson, Michelle Rodriguez, Jason Statham og Paul Walker.