Bindið sem handboltakappinn Logi Geirsson bar í útsendingu RÚV fyrir og eftir landsleik Íslands og Hvíta-Rússlands í handbolta vakti mikla athygli. Í morgun sagði Logi að bindið hefði kostað hann 300 þúsund krónur en það fæst nú á rúmlega 30 þúsund krónur hjá framleiðanda.

Logi var gestur Brennslunnar, morgunþætti FM957, í morgun. Þar sagði Logi bindið væri það flottasta og dýrasta sem hægt væri að kaupa.

„Ég bjóst við að annar hver maður myndi þekkja þetta bindi, þetta eru náttúrulega dýrustu og flottustu bindi sem er hægt að kaupa sér. Þetta kostaði mig 2000 dollara og 300.000 kall að koma með þetta heim í sumar,“ sagði Logi og bætti við að hann hefði farið sérstaklega út til New York að sækja bindið.

Bindið er af gerðinni Hex og má finna til sölu á vefsíðu Hextie. Þar er bindi eins og Logi var með á miklum afslætti og kostar nú 250 dollara, eða 32 þúsund krónur. Eins og sjá má á meðfylgjandi mynd kostaði það, líkt og Logi greindi frá, 2.000 dollara áður en það fór á útsölu.

Frá vefsíðu Hextie. Hér má sjá bindið hans Loga til sölu á miklu afslætti.

Hér má hlusta á viðtalið við Loga frá því í morgun.