„Ég spurði hvort ég mætti fara í sund áður en ég losnaði og þeir sögðu já,“ segir Sigurður Ingi Þórðarson, betur þekktur sem Siggi hakkari, í viðtali í helgarblaði DV.

DV greindi frá því þann 23. ágúst að Sigurður afplánaði eftirstöðvar dóms undir rafrænu eftirliti. Í september 2015 var hann dæmdur í þriggja ára fangelsi fyrir að brjóta kynferðislega gegn níu piltum. Í kjölfarið kom fram í Stundinni að foreldrar barna í Salaskóla væru ósáttir við að Sigurður stundaði sundlaugar í Kópavogsbæ í frítíma sínum og spunnust heitar umræður um málið.

Samkvæmt heimildum DV funduðu allir skólastjórar um málið og vildu að Sigurði yrði meinað að fara í laugarnar. Sigurður hafði verið nær daglegur gestur í sundlaugum frá því að hann losnaði í júní. Nú hefur DV fengið staðfest að Siggi hakkari hefur skrifað undir plagg þess efnis að hann megi ekki fara í sund. Hann þarf því framvegis að þrífa sig heima hjá sér.

Daginn eftir umjöllun fjölmiðla var honum meinað að fara í sund.

Í upphaflega plagginu sem veitti honum reynslulausn segir hann að hvergi hafi komið fram að honum hafi verið meinaður aðgangur að sundlaugum. Eftir háværar umræður var Sigurður boðaður á fund daginn eftir og þá hafði því skilyrði verið bætt við. Allar sundferðir væru hér eftir teknar af. Sem von er hefur ýmislegt verið sagt. Sigurður hefur verið kallaður skrímsli og oftar en einu sinni fólk viljað skipta út viðurnefninu hakkari fyrir nauðgara. Um þetta segir Sigurður:

„Að mörgu leyti finnst mér hún ósanngjörn og ekki rétt en það er ekki hægt annað en að skilja hana að vissu marki. Mér finnst til dæmis ekki rétt hvað sé fjallað um og hvað ég var dæmdur fyrir. Aldursmunurinn á mér og þeim sem að málið snýst um var mjög lítill,“ segir Sigurður og bætir við:

„Ég held að umræðan fari úr böndunum með hverri einustu frétt. Hvort sem hún er um mig eða einhvern annan. Ég skil þessi sjónarmið alveg en umræðan var dálítið asnaleg. Það var sagt að ég væri að mæta í sund þegar skólasund væri en svo gleymdist að athuga að skólasund er ekki einu sinni hafið. Á þeim tíma sem skólasund er á ég að vera í vinnu. Ég mætti alltaf í sund á kvöldin.“

Ítarlega er fjallað um mál Sigga hakkara í helgarblaði DV.