Forréttindi að fá að lýsa leikjum íslenska liðsins – Þáttur stuðningsmanna einstakur
Guðmundur Benediktsson, sem gengur alla jafnan undir nafninu Gummi Ben, hefur, eins og flestir landsmenn hafa tekið eftir, farið hreinlega á kostum í lýsingum sínum á leikjum íslenska landsliðsins á Evrópumótinu í knattspyrnu. Lýsingar, eða öllu heldur tilfinningar hans og tilburðir, hafa ennfremur farið eins og eldur í sínu um heim allan, í fjölmiðlum og á samskiptamiðlum.
Hvað skyldi Gummi sjálfur segja um þessi viðbrögð umheimsins?
„Ég veit ekki hvað skal segja en leikurinn við Austurríkismenn er ein af stærstu stundunum í íslenskri íþróttasögu er mér óhætt að fullyrða. Það er hrein forréttindi að fá að lýsa slíkum viðburði, það er alveg ljóst,“ sagði Gummi Ben.
Hvað fór um hugann á lokamínútum leiksins við Austurríki. Þú slepptir gersamlega fram af þér beislinu?
„Það er alveg hægt að segja það með sanni að ég hafi sleppt fram af mér beislinu. Það er ofsalega skemmtilegt að geta haldið gjörsamlega með öðru liðinu og fyrir vikið sleppir maður sér alveg. Þetta er mjög sérstakt, þetta er landsliðið okkar og forréttindi að fá að lýsa leikjum liðsins og það í þessari keppni. Þetta er engu líkt.“
Varstu lengi að ná þér niður eftir lýsinguna á miðvikudagskvöldið?
„Þetta var ekki ósvipað eftir knattspyrnuleik sem maður tekur sjálfur þátt í. Ég var ekki að sofna strax, var hátt uppi og gersamlega búinn á því. Eftir svona lýsingu er maður ekki til afreka, það tekur tíma að ná sér niður.“
Guðmundur sagði þessi úrslit við Austurríki ein þau merkustu í íslenskri íþróttasögu. Við erum ekki búnir að tapa leik í og vinnum okkar fyrsta sigur í keppninni gegn Austurríki. Sá sigur tryggði okkur sæti í annan risaleik í mótinu. Það er hreint magnað út af fyrir sig og verður geggjaður leikur að mati Guðmundar.
16 LIÐA ÚRSLIT! 2-1!!
ÞVÍLÍKUR ÁRANGUR!#ISL #ISL #ISL #ISL #ISL https://t.co/qnc1XGbz1p
— Síminn (@siminn) June 22, 2016
//platform.twitter.com/widgets.js
„Stuðningsmennirnir okkar, Bláa hafið, sem ég vil nefna svo, og þáttur þeirra allur í þessu dæmi, kallar líka fram ólýsanlegar tilfinningar. Þeir hafa verið stórkostlegir og hróður þeirra hefur farið víða. Það er varla hægt að lýsa þessu með orðum.“
Er mótið búið að vera mikil upplifun?
„Heldur betur. Fyrsti leikurinn í St. Etienne var einstök stund þar sem maður fékk gæsahúð löngu fyrir leik. Þá var maður fyrst almennilega að átta sig á því að við Íslendingar værum í raun þátttakendur á þessu móti. Í Marseille, þrátt fyrir stórkostlega umgjörð vallarins, var stemningin ekki eins. Fjöldi stuðningsmanna okkar lenti í erfiðleikum með að komast inn á leikvanginn og sumir komust ekki í sæti fyrr en leikurinn var hafinn. Sem betur fer lenti enginn í svona kringumstæðum fyrir leikinn á móti Austurríki og bara geðbilað að sjá íslensku stuðningsmennina og stemninguna sem þeir komu með inn í leikinn.“
Hefur þú trú á því að liðið haldi uppteknum hætti og komist í 8-liða úrslit mótsins?
„Ég hef enga ástæðu til að hafa ekki trú á þessu liði. Það er kannski þvert gegn öllu eðlilegu að spá því að Íslendingar eigi möguleika gegn Englendingum sem á að vera á pappírunum miklu sterkara lið. Við eigum hins vegar lið sem neitar að tapa. Ég myndi aldrei þora að spá því að við myndum tapa fyrir enska liðinu. Íslenska liðið trúir því ekki að það tapi leik,“ segir Guðmundur.
Guðmundur kom heim til Íslands í gær en hann gerir ekki langan stans. Hann ætlar að lýsa leiknum frá Nice á mánudagskvöldið. Hann segist fara utan um helgina og hlakka mikið til leiksins.
Margir segja að þú sért orðinn heimsfrægur á lýsingum þínum. Hvað viltu segja sjálfur um það?
„Nei, ég held að ég sé það örugglega ekki og hef engan áhuga á því. Lýsingin mín á síðustu mínútum leiksins gegn Austurríki fór víða og síminn fór að hringja snemma morguninn eftir. Alls konar fjölmiðlamenn reyndu að ná tali að mér. Ég asnaðist til svara í fyrstu en lét þá síðan alveg vera enda hafði öðrum hnöppum að hneppa en að vera í einhverjum fjölmiðlasirkus. Ég er bara Gummi Ben og þannig vil ég hafa það,“ segir Guðmundur sem var smám saman að fá röddina aftur eftir magnaða lýsingu á miðvikudagskvöldið.
