Einn sterkasti maður jarðarinnar, Hafþór Júlíus Björnsson er um þessar mundir staddur í Los Angeles ásamt kærustu sinni, Andreu Sif Jónsdóttur. Líkt og kunnugt er hefur Hafþór öðlast heimsfrægð sem „Fjallið“ í hinum geysivinsælu sjónvarpsþáttum Game of Thrones. Hefur parið því þurft að þola töluvert áreiti paparazzi ljósmyndara.
Breska Daily Mail gerir sér fréttamat úr þessu og greinir frá því að kraftajötuninn hafi „yfirgnæft kærustu sína“ þar sem þau voru í verslunarferð í borg englanna á dögunum. Skartaði Hafþór Júlíusstuttermabol með ansi hreint áhugaverðri áletrun, og tekið er sérstaklega fram að hann innbyrði sex til átta máltíðir á dag til að halda sér í formi. Þá kemur einnig fram að „hin dökkhærða fegurðardís“ hafi klæðst aðsniðnum grænum kjól og skartað sólgleraugum.
„Við erum bara að versla. Sé ykkur seinna,“ á Hafþór Júlíus að hafa sagt við ágenga ljósmyndara. Þá birtir vefurinn einnig meðfylgjandi myndband þar sem sjá má parið á röltinu í Beverly Hills.
[youtube https://www.youtube.com/watch?v=HoJ8st7m924&w=600&h=392]
Í samtali við Reddit AMA árið 2014 sagði Hafþór Júlíus meðal annars að þó svo að hann sé gífurlega sterkur þá hafi konurnar í lífi hans aldrei haft neitt á móti því að sjá hans „mjúku“ hlið. Hann mun halda áfram að birtast á skjánum í sjöttu þáttaröð Game of Thrones.
