Fjárfestirinn og hagfræðingurinn Heiðar Guðjónsson virðist kunna að meta góða og glæsilega sportbíla. Hann var meðal þeirra fyrstu sem eignuðust eintak af hinum eftirsótta rafmagnslúxusbíl Tesla Model S hér á landi þegar hann kom á markað, en slíkur bíll getur kostað 12–15 milljónir króna. Í vikunni eignaðist Heiðar síðan nýjan og jafnvel enn glæsilegri bíl. BMW M4-sportbíl.

Eftir því sem DV kemst næst er um einstakan bíl að ræða þar sem hann er sá eini sinnar tegundar hér á landi. Skráður eigandi bifreiðarinnar er Ursus ehf., eignarhaldsfélag Heiðars, en sjálfur er hann skráður umráðamaður bifreiðarinnar. Þeir sem til þekkja segja að M4-bílar BMW séu með þeim glæsilegri og öflugustu sem völ er á. Herma heimildir DV að bifreið Heiðars sé rúm 420 hestöfl.

Heiðar, sem er einn umsvifamesti fjárfestir á landinu, vildi ekki tjá sig um bílakaupin þegar DV sló á þráðinn til hans til að forvitnast um þennan einstaka bíl. Því liggur ekki fyrir hvort hann hafi losað sig við Tesla-rafbílinn eða hvaða útbúnaði eða eiginlegum nýi bíllinn er gæddur.

Ljóst er að Heiðar, sem er sterkefnaður fjárfestir, getur leyft sér ýmislegt þegar kemur að bílamálum. Heimildir DV herma að nýir BMW M4-bílar geti kostað 17–19 milljónir króna, komnir á götuna. En það veltur allt á því hvernig þeir eru útbúnir.