„Þetta er lélegast lag Eurovision-sögunnar frá upphafi,“ sagði Þórður Helgi Þórðarson, betur þekktur sem Doddi litli, um framlag Rúmeníu í Eurovision, í þættinum Alla leið. Líkt og hefur komið fram áður í fréttum fá keppendur ekki að stíga á svið þar sem rúmenska ríkissjónvarpið er í skuld upp á 200 milljónir við Samband evrópskra sjónvarpsstöðva.

Friðrik Dór, Selma Björnsdóttir og Doddi litli ræddu um lagið í þættinum og voru nokkuð óvægin í umfjöllun sinni. Sagði Doddi lagið það lélegasta í sögunni og Friðrik Dór að atriðið væri eins og búningapartý í Öskjuhlíðinni.

Greta Salóme, sem flytur framlag Íslands í keppninni í næsta mánuði, segir leiðinlegt að verða vitni að neikvæðninni í garð lagsins. Segir Greta að hún hafi hitt söngvarann í Amsterdam og London og hann hafi verið einstaklega jákvæður og góður við aðra keppendur. Þá hafi hann komið vel fram við systur Gretu sem finnst að álitsgjafar þurfi að vanda sig í sjónvarpi. Hún segir um dómhörku Dodda:

„Það að fullyrða að eitthvað sé lélegasta lag frá upphafi er ekki beint uppbyggileg gagnrýni. Eigum við ekki að setja skoðanir okkar í aðeins vandaðri búning í stað þess að gera lítið úr fólki? Sérstaklega í fjölskyldusjónvarpsefni þar sem krakkar eru að horfa.“

Lagið má sjá fyrir neðan. Spurningin er því: Hefur Doddi rétt fyrir sér?

[youtube https://www.youtube.com/watch?v=BUQp3405lNI&w=640&h=360]