Tónlistarmaðurinn Prince sem féll frá í fyrradag, 57 ára að aldri, hafði á áratugaferli sínum sem einn fremsti tónlistarmaður heims þénað milljónir Bandaríkjadala á plötusölu og tónleikum.

Talið er að auðæfi Prince séu metin á sem nemur 36 milljarða íslenskra króna, eða tæplega 300 milljónir Bandaríkjadala. Prince var ókvæntur og barnlaus þegar hann féll frá svo óvíst er hver mun erfa öll auðæfin. Prince eignaðist soninn Gregory með fyrrverandi eiginkonu sinni, Mayete Garcia, en hann lést aðeins viku eftir að hann kom í heiminn. Þá missti Mayete fóstur skömmu síðar.

Breska blaðið Mirror velti þessu upp á vef sínum en þar kemur fram að ekki sé útilokað að einhver hluti auðæfanna muni renna til Votta Jehóva sem Prince skírðist til skömmu upp úr aldamótum. Það mun þó allt velta á því hvað kemur fram í erfðaskrá tónlistarmannsins. Fari svo að hann hafi ekki útbúið erfðaskrá er talið víst að allar hans eignir muni renna til systur hans, Tyka Nelson.

Eftir að það spurðist út að Prince væri fallinn frá hafa margir keypt plöturnar hans og eru tvær þeirra nú í hópi tuttugu vinsælustu platna Bandaríkjanna. Fullyrt hefur verið að Prince hafi átt gríðarlegt magn af óútkomnu efni í hvelfingu á heimili sínu í Minneapolis. Hafa sumir gengið svo langt að halda því fram að þar séu að finna hátt í tuttugu þúsund lög sem aldrei hafa heyrst opinberlega.