„Þegar ég var í grunnskóla var ég lagður í einelti í um þrjú ár. Það var það alvarlegt að það endaði hjá lögreglu. Maður hljóp heim úr skólanum og faldi sig á milli tíma. Helst vill maður ekkert muna eftir þeim tíma,“ segir Sigurbjörn Gunnarsson, þátttakandi í Biggest Loser Ísland á SkjáEinum. Sigurbjörn var þyngsti keppandinn sem tók þátt, eða 203 kíló.

Skipað að léttast Sigurbjörn segir í viðtalinu á mbl.is að yfirmaður hans hafi skipað honum að léttast, ella eiga á hættu að verða rekinn.

Í viðtali sem birtist á mbl.is í dag segir Sigurbjörgn að hann hafi verið lagður í alvarlegt einelti á sínum yngri árum. Eineltið hélt áfram þegar Sigurbjörn var komin á vinnumarkað og segir hann að yfirmaður hans á sínum tíma hafi skipað honum að léttast, ella eiga á hættu að verða rekinn.

„Ég var með yfirmann sem sagði bara mjög einfaldlega: „Þú léttist eða þú verður rekinn“. Sigurbjörn segir að hann hafi þurft að mæta til yfirmanns síns einu sinni til tvisvar í mánuði þar sem hann upplýsti hann um hversu mörg kíló hann hefði misst þann mánuð.

„Ef það var ekki nóg þá fékk ég bara að heyra það að ég væri bara aumingi, gæti þetta ekki og skyldi gera betur. Það fór út í það að ég fór að ljúga að honum og gerði það í hálft ár án þess að léttast – en alltaf hélt hann að ég léttist,“ segir Sigurbjörn og bætir við að þetta hafi verið erfiður tími.

Sigurbjörn segir að honum líði ekki vel innan um fólk. Áður en hann hóf keppni í Biggest Loser hafi hann varið frítíma sínum að megninu til í tölvunni. „Mér finnst ég vera fyrir, eigi ekki að vera þarna. En auðvitað veit ég að þetta er bara hausinn á mér. Það er kannski það sem ég þarf líka að laga. Þyngdin hjálpar ekki til,“ segir Sigurbjörn sem hefur skýr markmið. „Stefnan hjá mér er að verða 100 til 110 kíló.“

Biggest Loser Ísland verður á dagskrá SkjásEins í kvöld klukkan 20.00. Viðtalið á mbl.is má sjá í spilaranum hér að neðan.