Öllu tjaldað til í afmælisveislu Mayu Henry í San Antonio í Bandaríkjunum
Það er óhætt að segja að foreldrar Mayu Henry frá San Antonio í Bandaríkjunum hafi tjaldað öllu til við skipulagningu afmælisveislu stúlkunnar sem hélt upp á fimmtán ára afmæli sitt á dögunum. Talið er að veisluhöldin hafi kostað sex milljónir Bandaríkjadala, eða tæplega 800 milljónir króna.
Maya Henry er dóttir Thomas J Henry, en hann er eigandi stórrar lögfræðistofu sem sérhæfir sig í slysabótum. Veislan var haldin í glæsilegum fimm þúsund fermetra veislusal í San Antonio, sem skreyttur var með stórum kirsuberjatrjám, og léku tónlistarmenn á borð við Pitbull og Nick Jonas fyrir dansi.
Afmælisbarnið skartaði rándýrum Rolando Santana-kjól og það var enginn viðvaningur sem sá um að farða Mayu. Förðunin var í höndum Patrick Ta, sem meðal annars hefur unnið fyrir Kim Kardashian. Þá myndaði atvinnuljósmyndarinn Donna Newman afmælisveisluna, en hún hefur til að mynda unnið fyrir leikarann Matt Damon og forstafrúna Michelle Obama.
Faðir stúlkunnar, Thomas J Henry, og móðir, Azteca, fengu David Monn, þekktan viðburðaskipuleggjenda, til að sjá til þess að afmælisveislan yrði sem glæsilegust. Þeir 600 gestir sem mættu í afmælið urðu væntanlega ekki fyrir neinum vonbrigðum og lýsti afmælisbarnið yfir ánægju sinni á Instagram að veislunni lokinni.
„Þetta var stórkostlegt kvöld sem ég mun aldrei gleyma. Ég er þakklát þeim sem mættu og ég er þakklát foreldrum mínum sem eru ótrúlegir,“ sagði Maya sem er með átján þúsund fylgjendur á Instagram. Þar hefur Maya hefur meðal annars birt myndir af sér með stjörnum á borð við Justin Timberlake, Justin Bieber og Katy Perry.