George Martin lést á heimili sínu 90 ára að aldri – Einn allra áhrifamesti upptökustjóri tónlistarsögunar
George Martin, sem gjarnan hefur verið kallaður „fimmti Bítillinn,“ er látinn. Martin var einn allra áhrifamesti upptökustjóri tónlistarsögunnar en hann kom Bítlunum á kortið í upphafi sjöunda áratugs síðustu aldar.
Það var Ringo Starr, trommari Bítlanna, sem tilkynnti um andlát Martins á Twitter í gær.
Í tilkynningu frá sem barst síðar frá aðstandendum Martins segir að hann hafi látist á heimili sínu vegna aldurs, en hann var 90 ára þegar hann lést.
Martin er þekktastur fyrir að taka upp og útfæra lög Bítlanna. Martin gerði samning við drengina frá Liverpool árið 1962, eftir að þeim hafi verið hafnað af nokkrum útgáfufyrirtækjum.
Martin naut gríðarlegrar velgengni í tónlistargeiranum og tók meðal annars upp, og útfærði, 30 smáskífur sem náðu efsta sæti á breska vinsældarlistanum og 23 í Bandaríkjunum. Árið 1996 var hann svo sleginn til riddara af Elísabetu Englandsdrottningu.