„Ég held að það sé mjög mikilvægt að vekja athygli á þessu enda geta hestar verið viðkvæmir og fælst auðveldlega,“ segir María Guðný Rögnvaldsdóttir en hún varð fyrir óskemmtilegri reynslu fyrr í dag þegar hún brá sér í útreiðartúr. Keyrði þá fram hjá henni snjóplógur á miklum hraða og án þess að hægja á sér með þeim afleiðingum að hestur Maríu fældist af veginum og hljóp í burtu og endaði með að María lenti undir hestinum. Það er ljóst að illa hefði getað farið. Þá keyrði annar ökumaður framhjá án þess að athuga með stúlkuna.

Í samtali við DV.is segir María að atvikið hafi átt sér stað rétt fyrir utan Hvolsvöll fyrr í dag, nálægt hesthúsahverfinu en þar er reiðleið á stuttum kafla framhjá þjóðveginum og 50 kílómetra hámarkshraði. „Þetta var um hálf sex leytið. Það eru skilti þarna í kring sem gefa til kynna að það sé umferð hestamanna á svæðinu. Skyndilega kemur þarna snjóplógur á miklum hraða,“ segir hún en hún segist ekki efast um að umræddur bílstjóri hafi séð sig og hestinn. „Hann hefði ekki þurft að gera annað en að hægja aðeins á sér eða beygja aðeins til vinstri en í stað þess hélt hann áfram á fullri ferð. Það var rosalega mikill hávaði í vélinni og mikill snjór sem fylgdi þannig að hesturinn varð dauðhræddur.“

Hún segir hestinn hafa orðið dauðskelkaðan við þessar aðfarir. „Hann hljóp af veginum og utan í girðingu þannig að ég lenti undir honum. Hann hljóp svo hræddur í burtu þannig að ég var ein eftir.“

Hún segir að bílstjóri bílsins sem kom í humátt á eftir plóginum hafi að öllum líkindum orðið vitni að atvikinu en hann hafi þó ekki brugðist við. „Ég var í appelsínugulri úlpu þannig að ég hef líklegast ekki farið fram hjá honum. Hann hægði aðeins á sér og horfði á mig en hélt svo bara áfram,“ segir hún og bætir við að sem betur fer hafi næsti bíll sem kom á eftir stoppað og veitt henni aðstoð við að komast heim.

Hún tekur fram að það sé ekki ætlunin að benda fingri á neinn með frásögn sinni en hvetur fólk til að horfa í kringum sig á þjóðveginum og sýna nærgætni. „Ég vil benda á hversu mikilvægt það er að ökumenn taki tillit til þeirra sem eru á ferð á hestum. Fólk keyrir oft mjög hratt þarna fram hjá á miklum hraða og ég hef til dæmis lent í því að fólk flauti á mig með miklum látum. Það veit kannski ekki hvað hestarnir geta verið viðkvæmir, auk þess sem að sumir þeirra hafa kannski ekki verið mikið tamdir. Það er sjálfsagt að taka tillit til næstu manneskju, hvort sem hún er á hesti, hjóli eða annað. Þetta hefði auðveldlega getað farið miklu verr.“