Stefán Jóhannsson lyfjafræðingur varð vitni að fallegu góðverki af hálfu bláókunnugs manns í matvöruverslun í gær. Segist hann snortinn yfir hugulseminni og því trausti sem maðurinn hafi borið til hans. Hringbraut greindi fyrst frá.

„Ég mátti til með að segja frá þessu þar sem að þetta hreyfði virkilega við mér,“ segir Stefán í samtali við DV.is. „Það væri bara óskandi að fleiri myndu taka upp á þessu, að koma náunganum til bjargar,“ segir hann jafnframt.

Hann sagði upphaflega frá atvikinu á fésbókarsíðu sinni. „Ég var staddur á kassa í Krónunni í Lindum rétt fyrir kvöldmat þegar ég átta mig á því að peningaveskið mitt var heima á Álftanesi. Ekki var í boði að borga með símgreiðslu á kreditkort.

Hann segist hafa séð fram á töluverða seinkun vegna þess en þá hafi hið óvænta gerst.

„Næsti maður í röðinni sagðist ætla að borga þetta fyrir mig og ég gæti svo bara millifært á hann rúmlega 8 þúsund,“ segir hann og kveðst hafa orðið gapandi hissa enda hafði hann aldrei séð manninn áður.

Í samtali við DV.is segir hann að hann hafi að sjálfsögðu þakkað manninum innilega fyrir og millifært á hann til baka. „Tiltrú mín á hið góða í mannfólkinu hefur óneitanlega aukist við þessa upplifun.“