Aðalkakan í öllum fjölskylduboðum
Elín Jónína Bergljótardóttir er bústýra á gamla, góða Kaffivagninum á Grandanum. Hún gefur lesendum Birtu uppskrift að súkkulaðikaffiköku sem var alltaf kennd við Ungverjaland í æsku hennar.
Elín kom fyrst að rekstri veitingastaða þegar hún opnaði kaffihús og veitingastað í Xiamen í Kína ásamt eiginmanni sínum, Rúnari Sigurbjörnssyni. Staðurinn hét Heima Café og þar buðu þau upp á alls konar mat, gjarna með íslensku yfirbragði; plokkfisk, lambakjöt og pönnukökur svo sitthvað sé nefnt. Sjálf sá Elín um kökur, eftirrétti og hvers kyns sætindi meðan bóndinn eldaði matinn.
„Okkur langaði að prófa eitthvað nýtt. Upplifa ævintýri, svo úr varð að við fórum til Kína. Þetta var mjög skemmtilegur tími.“
Hjónin sneru aftur sex árum síðar. Þá rak Elín kaffihús Súfistans í Iðuhúsinu og Máli og menningu en nú hefur hún tekið við búi í Kaffivagninum sem hún stýrir af mikilli alúð. Hún segist leggja mikla áherslu á að halda í hefðirnar sem hafa skapast á Kaffivagninum enda eitt elsta og vinsælasta kaffihús borgarinnar fyrr og síðar. Eini stóri munurinn er sá að nú er líka opið á kvöldin og þá er boðið upp á góðan mat í kósí umhverfi. Kerti á borðum og blóm í vasa. Það má líkja þessu við svona kósí „diner“.
Alveg frá því hún var lítið barn hefur Elín haft sérstaka unun af því að baka. Hún hefur því safnað uppskriftum frá fjölskyldu sinni og sumar hefur hún betrumbætt örlítið á meðan aðrar fá að halda sér.
„Kakan sem ég gef hér uppskrift að á sér langa sögu í minni fjölskyldu en hún kemur frá föðurömmu minni og nöfnu, Jónínu Jóhannesdóttur. Í öllum fjölskylduboðum er þetta KAKAN. Hún var alltaf kölluð Ungverska kakan en kannski þekkja aðrir hana undir einhverju öðru nafni. Möndlumarengskaka með kaffisúkkulaðikremi. Amma sem var tíu barna móðir og mikil húsmóðir elskaði marengskökur. Það var alltaf svo gott að koma til ömmu á Flókagötuna af því hún var alltaf að baka eitthvað gott og ilmurinn barst um allt hús,“ segir Elín sem bakaði fyrst þessa girnilegu köku þegar hún var unglingur.
Botnar
7 egg
300 g sykur
350 g hakkaðar möndlur
Krem
150 g smjör, við stofuhita
3 msk. sykur
3 tsk. instant-kaffi
125 g suðusúkkulaði, saxað
Botnar
Þeyta eggjahvítur og sykur
Svo er möndlum blandað saman við með sleif
Sett í 2 meðalstór smelluform og bakað við ca. 160 gráður í 40 til 45 mín.
Krem
7 eggjarauður þeyttar vel með 2 msk. sykri
3 tsk. instant-kaffi hrært út í örlitlu kaffi svo þetta verður extra sterk blanda, það er svo sett út í
Svo er smjörinu bætt rólega út í
Og allt þeytt rólega saman
Síðan er súkkulaðinu skellt út í
Kremið er sett á milli og ofan á kökuna
