Leikarahjónin Zendaya og Tom Holland héldu brúðkaupsveislu með vinum sínum og vandamönnum á þriðjudag, eftir að hafa gift sig með leynd. Page Sic greinir frá að hjónin hafi fagnað með ástvinum sínum á Beaverbrook Hotel, sveitasetri í Surrey á Englandi.
„Tom og Zendaya lögðu sig fram um að koma í veg fyrir að upplýsingar eða myndir kæmust út, svo hvorki gestum né starfsfólki var leyft að hafa farsíma sína með sér,“ sagði heimildarmaður við Sun á þriðjudag. Mun starfsfólk hótelsins hafa þurft að skrifa undir trúnaðarsamninga (NDA).
Hjónin eru sögð hafa eytt meira en 670.000 dollurum í að leigja alla eignina, sem er um 24 km frá þar sem Holland ólst upp í suðvesturhluta London.
Law Roach, stílisti Zendaya, blaðraði því fyrir nokkrum mánuðum að parið væri þegar gift: „Brúðkaupið er þegar búið að eiga sér stað,“ sagði hann við Access Hollywood þegar hann gekk rauða dregilinn á SAG leikaraverðlaununum 2026 í mars. „Þið misstuð af því.“
Á sama tíma vakti Zendaya sögusagnir um að parið hefði gift sig með leynd þegar hún var mynduð með giftingarhring í stað risastórs fimm karata demants trúlofunarhrings síns. Parið tilkynnti trúlofun sína í janúar 2025 þegar Zendaya bar demantshringinn á Golden Globe verðlaunahátíðinni.
„Ég held að fólk ætti að óska þeim til hamingju,“ sagði Roach. „Þetta eru tveir ungir, fallegir og farsælir einstaklingar sem eru ástfangin og þau gifta sig með leynd og komust upp með það.“
Hjónin hafa lítið tjáð sig opinberlega um hjónabandið. Í júní var Holland spurður í viðtali við Esquire hvort hann þyrfti að ræða við fjölskyldu sína um gervigreindarmyndir af brúðkaupinu. „Nei, því þau voru öll þarna,“ sagði hann einfaldlega.
Og þegar Zendaya var að kynna nýjustu mynd þeirra, Spider-Man: Brand New Day, í Mexíkó í síðasta mánuði sagði hún við aðdáanda að hann væri „of seinn“ þegar hann bað um hönd hennar.
Zendaya og Holland kynntust árið 2017 á tökustað fyrstu myndar þeirra um Kóngulóarmanninn af fjórum, Spider-Man: Homecoming. Sögusagnir um samband þeirra hófust ári síðar, sem þau neituðu staðfastlega.
Það var fyrst í september árið 2021 sem þau opinberuðu ástarsamband sitt á Instagram þegar Holland gaf Zendaya sérstaka kveðju í tilefni af 25 ára afmæli hennar með mynd af þeim á bak við tjöldin á tökustað Spider-Man.
„Mín MJ, eigðu besta afmælisdaginn. Hringdu þegar þú ert vakandi xxx,“ skrifaði hann við myndina og Zendaya svaraði: „Hringi núna♥️.“
