Í síðustu viku hélt Snorri ræðu á þingi og gagnrýndi framkvæmdaáætlun í kynjajafnréttismálum fyrir árin 2025-2028 sem Þorbjörg Sigríður Gunnlaugsdóttir, dómsmálaráðherra og ráðherra jafnréttismála, mælti fyrir.
„Þótt gríðarlegum árangri hafi verið náð eru margar áskoranir sem bíða þess að vera leystar. Þar má nefna kynbundið ofbeldi sem er svartur blettur á okkar samfélagi. Heimilisofbeldi er allt of algengt. Einnig má nefna að ein stærsta hindrunin sem stendur í vegi fyrir launajafnrétti hér á landi felst í kynskiptum vinnumarkaði og vanmati hefðbundinna kvennastarfa í samanburði við hefðbundin karlastörf. Þá er enn mikil vinna eftir til að sporna gegn kynbundnu áreitni og ofbeldi gagnvart konum,“ sagði Þorbjörg.
Snorri gagnrýndi framkvæmdaáætlunina harðlega og kynjafræði sem fræðigrein.
@snorrimassonÞið sem hélduð að woke-ið myndi skána… Ég kynni til leiks: Viðreisn! 😍♬ Aleph Gesaffelstein – SoundVisualized
Alla ræðu Snorra má horfa á hér.
Ræða Snorra vakti hörð viðbrögð. María Hjálmtýsdóttir, aðalritari Félags kynjafræðikennara, sagði Snorra fara með rangfærslur og hræðsluáróður um kynjafræðikennslu í skólum landsins.
„Ræðan minnir um margt á þá brælu sem Bandaríkjaforseti og hans lið básúna yfir heimsbyggðina þessa dagana en þar er hatrið orðið svo mikið að jafnvel hörðustu nöglum stendur ekki á sama,“ sagði hún í færslu á Facebook.
Snorri mætti í kjölfarið í Reykjavík síðdegis á Bylgjunni til að ræða um gagnrýnina. Hann sagðist sjaldan hafa fengið eins jákvæð viðbrögð og eftir umrædda ræðu. Hann sagði einnig kynjafræði vera pólitíska í eðli sínu en það sé alltaf látið eins og hún sé fullkomlega hlutlaus. „En hún er það ekki. Það er bara margt innan kynjafræðinnar sem fólk getur ekkert neitað að er afar pólitískt í eðli sínu,“ sagði hann.
Þorsteinn er menntaður kynjafræðingur og kynjafræðikennari við Menntaskólann í Kópavogi. Hann segir Snorra hafa rétt fyrir sér.
„Snorri Másson hefur rétt fyrir sér,“ byrjar hann pistil samfélagsmiðlum Karlmennskunnar. Fyrsta yfirlýsingin gæti komið mörgum á óvart þar sem Þorsteinn og Snorri hafa iðulega verið ósammála. En Þorsteinn útskýrir nánar:
„Snorri Másson hefur rétt fyrir sér: Kynjafræði eru pólitísk fræði. Reyndar hef ég hvergi rekist á neinn halda öðru fram. Ástæða þessarar áréttunar Snorra þjónar auðvitað allt öðrum tilgangi en að dýpka fræðilega og gagnrýna umræðu. Orðræða hans er trumpískur áróður til að grafa undan kynjafræði og menntun sem honum þóknast ekki.“
Þorsteinn segir Snorra vita að mennt er máttur. „Besta leiðin til að draga úr mætti jafnréttisaðgerða er auðvitað að ráðast á stoðirnar, menntunina og rannsóknirnar. Gera kynjafræðinga og fræðigreinina tortryggilega og þar með máttvana. Þá verður auðveldara fyrir fasíska og forrétindafirrta hugmyndafræði Miðflokksins að dreifa úr sér.“
Þorsteinn bendir meðal annars á pistil Semu Erlu um málið á Facebook.
„Inga Bjarna og Karen Kjartans bentu á í aðskildum færslum á Facebook að það er engin fræðigrein laus við pólitík. Það er ekkert sem er algjörlega laust við hlutdrægni. Allt litast af tilteknu sjónarhorni og samhengi sem hefur áhrif á fólk. Pólitískt,“ segir Þorsteinn.
„Karlar telja sig oft handhafa hins hlutlausa sjónarhorns og veigra sér ekki við að viðra alls konar skoðanir án þess að hafa fyrir þeim nema sandkorn af þekkingu. Það er svo sem ekkert bara við þessa karla að sakast, þótt óskandi væri að sumir færu varlegar með áhrifamátt sinn. Karllæga gildismatið nærir karllægt sjálfstraust sem skapar tilkarla í hrönnum. Tilkarla sem tjá sig um kulnun, kynjafræði, fólk á flótta, trans, karlmennsku, líðan barna og hin ýmsu samfélagsmál,“ segir Þorsteinn.
Tilkarlar er tiltölulega nýtt hugtak og er notað fyrir karlmenn sem finnast þeir hafa tilkall til alls mögulegs, bara vegna þess að þeir eru karlar.
„Ef karlar, og sumar anti-woke konur, myndu einlæglega hlusta, þá gætu þau heyrt að femínismi, kynjafræðingar og konur eru ekki að vega að körlum. Það er ekki verið að grafa undan „eðli“ karla og drengja, woke vegur ekki að tjáningarfrelsi og engin innræting eða heilaþvottur á sér stað í kynjafræði,“ segir Þorsteinn og bætir við að „tilkarlar og anti-woke-istar“ geta andað rólega.
„Það er engin yfirtaka eða árás í gangi – nema sú sem þeir sjálfir standa fyrir.“
Hann segir að það eru þeir sem tortryggja rannsóknir, afbaka hugtök og umræðu og slá ryki í augu almennings. „Það eru þeir sem grafa undan […] lýðræðinu.“
Þorsteinn segir að á meðan kynjafræðin og „woke-liðið“ reynir að opna augu fólks reyni tilkarlar og „menn eins og Snorri“ að gera allt til að halda þeim lokuðum.
Allan pistil Þorsteins má lesa hér að neðan.
