Kristrún Frostadóttir, forsætisráðherra, sótti á dögunum fjölmennan leiðtogafund um frið og öryggi í Úkraínu. Það var Emmanuel Macron, forseti Frakklands, sem bauð til fundarins í Elyseé-höll í París í síðustu viku. Leiðarstef fundarins var „Evrópa er aftur mætt til leiks“.
Kristrún birti mynd af sér með Macron og vakti það athygli hvað hún var glæsileg til fara. Hún klæddist látlausum kremlituðum kjól. Pilsið nær niður fyrir hné og ermarnar eru svokallaðar kvartermar. Loks var kraginn á kjólnum upphár og útvíður. Sniðið á kjólnum er sérstaklega klæðilegt á Kristrúnu.
Kjóllinn er frá merki sem heitir Leem og má meðal annars kaupa hann í vefversluninni Zalando þar sem hann kostar á fullu verði 155 evrur, eða um 23 þúsund krónur. Hann er þó á afslætti núna og kostar 19.500 kr. Eða fólk getur keypt kjólinn í bresku versluninni Selfridges&Co en þar kostar hann 140 pund eða 24.800 kr.
