Það eru eflaust margir sem gera sér ekki grein fyrir að Sanna Magdalena Mörtudóttir oddviti Sósíalistaflokksins í borgarstjórn Reykjavíkur og hinn svokallaði hjólahvíslari Bjartmar Leósson eru náskyld en Bjartmar er yngri bróðir móður Sönnu.

Í Facebook-færslu rifjar Sanna upp það sem varð til þess að hún gekk til liðs við Sósíalistaflokkinn en það var glíma hennar sjálfrar og móður hennar við fátækt. Af því tilefni birtir hún með færslunni gamlar myndir, frá því að hún var barn, af þeim mæðgum við Reykjavíkurtjörn. Sanna skrifar:

„Lífsreynslan mun vonandi koma að góðum notum í starfi mínu sem nýkjörinn formaður velferðarráðs en á meðfylgjandi myndum er ég sennilega átta ára, við mæðgur nýkomnar á biðlista eftir félagslegu leiguhúsnæði. Á þeim tíma þurfti þriggja ára búsetu í sveitarfélaginu til að mega sækja um húsnæði en það var hægt að sækja um að vera undanþeginn því. Síðan þá hafa reglur breyst. Ég mun nýta þá rúma fjórtán mánuði sem eftir eru af kjörtímabilinu eins vel og hægt er og gera mitt besta til að breyta því sem þarf að breyta og laga það sem þarf að laga. Ég þakka traustið sem mér hefur verið sýnt og mun vanda mig eins vel og ég get við að vera forseti borgarstjórnar.“

En þær mæðgur eru ekki einar á myndunum en þar má einnig sjá yngri bróður móður Sönnu, Mörtu Leósdóttur, Bjartmar Leósson.

Á myndunum má sjá Bjartmar með reiðhjólahjálm á höfði og sjá má að reiðhjólið er ekki langt undan. Síðar meir átti Bjartmar eftir að öðlast landsfrægð fyrir þrotlausa vinnu sína við að endurheimta reiðhjól og annars konar muni sem hefur verið stolið. Fyrir þetta hlaut hann eins og margir eflaust vita viðurnefnið hjólahvíslarinn og raunar hefur frægð þessa frænda Sönnu borist út fyrir landsteinana.