Hjónin og tónlistarfólkið Regína Ósk Óskarsdóttir og Sigursveinn Þór Árnason kynntust fyrir 19 árum á tónleikum á Akureyri, nánar tiltekið 1. Apríl árið 2006. Svenni Þór er fæddur og uppalinn á Akureyri, en Regína Ósk var stödd þar til að kynna fyrstu sólóplötuna sína sem kom út árinu áður.
„Ég sá hana fyrst í sjónvarpinu í tónlistarmyndbandi og heillaðist strax. Var á leið út en þegar ég sá hana varð ég að klára myndbandið til að sjá hvað hún héti,“ segir Svenni Þór.
„Við hittumst svo í Sjallanum á Egó tónleikum 1. apríl 2006 þar sem hann kom til mín og vildi tala aðeins við mig og ég heillaðist strax af þessu óbilandi sjálfstrausti,“ segir Regína Ósk. „Þegar ég fór heim til Reykjavíkur gat ég ekki hætt að hugsa um hann og hann um mig.“
Hlutirnir þróuðust hratt. Svenni Þór flutti til Reykjavíkur til Regínu Óskar sem átti eigin íbúð sem hún bjó í með dóttur sinni. Bónorðið kom svo á Akureyri ári eftir fyrstu kynni á tómantísku kvöldi.
„Svenni Þór var búinn að vera svakalega skrýtinn allt kvöldið, með litla matarlyst og var eftir á að hyggja að deyja úr stressi.“
Parið gifti sig í ágúst 2008, og eiga þau samtals þrjú börn, Regína Ósk áttu dóttur fyrir og saman eiga þau tvö börn.
Aðspurð segir Regína Ósk margt sameina þau.
„Við erum lík á ýmsum sviðum og finnst gaman að gera margt saman, .tónlistin, matur, ræktin, ferðalög og fleira. Við erum gríðarlega ólík á sumum sviðum en bætum hvort annað upp.“
Hún segir þau dugleg að rækta sambandið tvö ein og dugleg að fara á tónleika, í leikhús, út að borða, eða ferðast erlendis.
„Okkur finnst rosalega mikilvægt að eiga sameiginleg áhugamál og líka að eiga áhugamál með vinunum. Þó við séum mikið saman, þá er nauðsynlegt að hann fari með vinum sínum í veiði, golf og svo framvegis. Og ég með mínum í göngu og eitthvað annað skemmtilegt. Sambandið breytist líka þegar börnin verða eldri.“
Þeir sem hafa verið eða eru í langtímasambandi vita að það er ekki alltaf gaman. Aðspurð um hvað þau geri þegar kemur brekka í sambandinu og áskoranir banka upp á segir Regína Ósk:
„Tala saman, fara í ræktina, út að ganga með hundinn og til dæmis að gera plötu saman. Við hjónin vorum semsagt að gefa út plötu saman í fyrsta sinn. Platan segir sögu okkar sem hófst fyrir 20 árum þegar við sáumst fyrst á Glerártorgi þar sem ég var að syngja og kynna fyrstu sólóplötuna mína. Fyrsta lag plötunnar heitir heitir einmitt Ég sá þig og svo raðast lögin eins og sagan okkar.“
Hjónin koma jafnframt oft fram saman, eru að veislustýra saman og fleira.
