Rinch þessi er tæplega fimmtugur og er best þekktur fyrir að hafa leikstýrt kvikmyndinni 47 Ronin sem kom út árið 2013. Myndin skartaði stórleikaranum Keanu Reaves í aðalhlutverki en fékk afleita dóma hjá gagnrýnendum.
Í frétt NBC News kemur fram að Rinsch hafi samið við streymisveituna Netflix árið 2018 um að hann myndi gera leikna vísindaskáldsöguþætti sem áttu að heita White House, síðar Conquest. Fékk hann 44 milljónir dala til að gera þættina að veruleika.
Árið 2020 fékk hann 11 milljónir dala til viðbótar þar sem hann lýsti því að þær 44 milljónir dala sem hann hafði áður fengið dygðu ekki fyrir kostnaði við eftirvinnslu þáttanna.
Rinch er hins vegar sagður hafa stungið þessum 11 milljónum dala í vasann og eytt peningnum í tóma vitleysu. Er hann sagður keypt sér fimm Rolls-Royce bifreiðar, Ferrari og antíkmuni auk þess að kaupa rafmyntir.
Þá er hann sagður hafa eytt um milljón dollurum í að borga fyrir þjónustu lögfræðinga sem lögðu fram stefnu gegn Netflix og fóru fram á að streymisfyrirtækið myndi greiða honum 14 milljónir dala. Ekki gekk það eftir og var honum sjálfum gert að greiða Netflix 8,8 milljónir dala.
Í frétt Deadline kemur fram að Rinch hafi ekki greitt Netflix upphæðina og þá hafi enginn þáttur af Conquest litið dagsins ljós. Netflix afskrifaði 55 milljóna dala kostnað vegna málsins og var leikstjórinn handtekinn síðastliðinn þriðjudag í Los Angeles. Segir Deadline að hámarksrefsing fyrir meint brot leikstjórans sé 90 ára fangelsi.
