Ragnhildur er stödd í Jamaíka og eitt af því skemmtilegasta sem hún gerir þegar hún er að heimsækja nýtt land er að upplifa ræktarmenningu þess.
„Því lífsstíllinn fer ekki í frí þó skipt sé um póstnúmer og ferðast um lönd og höf. Það þarf samt að heiðra þörf líkamans fyrir hreyfingu,“ segir hún.
Ragnhildur fann góða líkamsrækt sem margir helmassaðir ræktargestir sóttu.
„Einn meðlimur gekk upp að Naglanum og spurði til nafns. Eftir kynningu á báða bóga spurði félaginn: „Ertu spretthlaupari?“
[Ragga nagli:] „Ha ég… nei nei nei. Af hverju spyrðu að því?“
[Maðurinn:] „Af því þú ert bæði vöðvastælt og greinilega með lága fituprósentu. Hvaða íþrótt stundarðu?“
[Ragga nagli:] „Aðallega lyfta lóðum og jú ég tek spretti og sprengiæfingar. Hef gert það í 27 ár.“
[Maðurinn:] „27 ár?? Bíddu, bíddu….. hvað ertu gömul?“
[Ragga nagli:] „46 ára á þessu ári.“
Þarna stækkuðu augun hjá félaganum svo sást í hvítuna.
[Maðurinn:] „Í alvöru…. ég hefði haldið að þú værir allavega 10 árum yngri.“
Hvort hann var bara að skjalla Naglann, eða hvort hann meinti þetta í raun og veru, þá hlýjuðu þessi orð allavega hjartarótunum í sjóðheitu karabíska loftslaginu.“
Ragnhildur segir að lyfta lóðum sé „yngingarmeðalið sem við öll leitum að logandi ljósi.“
„Því það stuðlar að unglegra hormónakerfi með losun á testósteróni, vaxtarhormónum, IGF-1, í kjölfar viðskipta okkar við stálið,“ segir hún.
„Sparaðu aurinn í hrukkukrem, leirmaska og ávaxtasýruserum, og strappaðu þig upp, kalkaðu lófana og rífðu í járnið. Kannski færðu hrós frá huggulegum ungum manni, konu, hán í ræktinni.“
