Tónlistarfólkið Ágúst og Klara Einars senda frá sér lagið Bara ef þú vissir i dag.
Bæði stigu þau inn á stóra svið tónlistarinnar á síðasta ári hvort með sitt lag og árið var þeim báðum gott. Þannig eru þau bæði tilnefnd sem nýliðar ársins á Hlustendaverðlaunum 2025 sem afhent verða í næstu viku.
Ágúst og Klara slá ekki slöku við því Ágúst byrjaði árið með því að koma sér alla leið í úrslit Söngvakeppninnar núna í febrúar með laginu Eins og þú. Ágúst heillaði þar sjónvarpsáhorfendur með faglegri nálgun og einlægum flutningi. Þá var Klara að gefa út dúettinn VBMM? í síðustu viku ásamt söngkonunni Katrínu Myrru, lag sem er komið á fulla ferð á útvarpsstöðum landsins.
„Síðustu mánuðir hafa verið alveg stórkostlegir, bæði að að stíga inn í Stuðlabandið og hvað fyrsta lagið mitt Með þig á heilanum gekk vel,“ segir Ágúst. „Svo er ég að koma niður á jörðina eftir Söngvakeppnina sem var reynsla sem ég er rosalega þakklátur fyrir“.
„Síðasta ár var alger rússíbani, mikil gleði og auðvitað mikil vinna,“segir Klara. „Það var ótrúlega mikil viðurkenning að fá tilnefninguna til Hlustendaverðlaunanna og eiginlega meira heldur en ég hefði þorað að vona“
Klara og Ágúst hafa ekki unnið saman áður, en lagið er samið af Ágústi og Hákoni Guðbjarti Hjartarsyni sem stjórnaði upptökum. Þeir félagar settu sig í samband við Klöru í haust með það í huga að fá hana inn í þetta lag.
„Klara var einhvern veginn perfect match fyrir lagið og við erum á svipuðum stað á okkar ferli,“ segir Ágúst. „Það var mjög gaman að vinna með strákunum,“segir Klara. „Eiginlega það gaman að ég og Hákon fórum svo bara beint í næst verkefni en ég segi ykkur frá meira frá því seinna. Ég hlakka mikið til að finna viðtökurnar við laginu“.
