Ísdrottningin og fyrrverandi forsetaframbjóðandinn Ásdís Rán Gunnarsdóttir og kærasti hennar, Þórður Daníel Þórðarson, mættu í sínu fínasta pússi í glæsilega veislu á vegum ítalska sendiráðsins í Búlgaríu.

Venetian Gala er árlegur viðburður sem færir töfra ítalskrar menningar til Búlgaríu.

„Kvöldið var algjörlega töfrandi,“ sagði Ásdís Rán í samtali við DV.

„Allt frá fallegum ítölskum handmáluðum grímum og dýrindis mat til fyrsta flokks vína – þetta var eins og að stíga inn í annað tímabil í hjarta Feneyja.“

Ásdís Rán og Þórður vöktu mikla athygli á rauða dreglinum, enda einkar glæsilegt par. Þau tóku þátt í grímudansinum sem vekur mikla lukku á hverju ári.

„Það var svo magnað að sjá alla með þessar fallegu feneysku grímur, sem gestir fengu í gjöf, og upplifa dásamlega ítalska stemningu í hjarta Sofiu í Búlgaríu,“ bætti Ásdís við. „Nú þurfum við að skella okkur í heimsókn til Feneyja!“

Þórður tók undir með sinni heittelskuðu og sagði að kvöldið hafi verið einstök upplifun.

Þetta gaf Ásdísi góða hugmynd. „Kannski kemur að því að ég setji upp íslenskan viðburð hér í Búlgaríu,“ segir hún.

Sjáðu fleiri myndir frá kvöldinu hér að neðan.