„Hvort raddir gamalla eru merkilegri eða ómerkilegri en annarra, ég hef enga skoðun á því. Það fer allt eftir einstaklingum,“

segir Þorvaldur Kristinsson, rithöfundur, bókmenntaritstjóri og aðgerðasinni í baráttu hinsegins fólks, sem er 75 ára. Í viðtali við Sigurlaugu Margréti Jónasdóttur í þættinum Segðu mér á Rás 1 segist Þorvaldur halda á eldri árum að gamalt fólk sé komið í tísku.

Veikindin fengu hann til að horfast í augu við sjálfan sig

Þegar Þorvaldur var 26 ára missti hann sjón á öðru auga og læknar töldu að hann yrði alblindur og Þorvaldur var spurður hvort hann hefði einhvern að sjá um sig ef hann missti alla sjón. Hann gekkst undir skurðaðgerðir í Reykjavík, Kaupmannahöfn og í London hjá augnskurðlækni sem bjargaði öðru auganu.
Veikindin tóku sinn toll andlega og Þorvaldur fann sig knúinn til að horfast í augu við hver hann væri. Árið 1979 kom Þorvaldur 29 ára gamall út úr skápnum þá í sambúð með konu, sem hann bjó með í sjö ár og ól dóttur hennar upp.

„Aldur þeirra sem átta sig á kynhneigð sinni hefur færst langt niður í dag en í minni tíð ríkti algjör þögn um samkynhneigð í mínu samfélagi. Það sem er þagað um er ekki til. Ég var í sambúð með góðri konu sem ég elskaði heitt og elska enn. Maður hættir ekkert að elska, slekkur ekki á ástinni hafi maður séð inn í sálina á öðrum.“

Varð fyrir miklu aðkasti eftir að hann flutti heim

Þorvaldur flutti heim til Íslands aftur og fyrstu tíu árin kom hann fram í blöðum undir mynd, í útvarpi og sjónvarpi sem aðgerðasinni í málefnum hinsegin fólks, og varð fyrir miklu aðkasti.

„Ég gerði mér grein fyrir að þetta myndi takast á Íslandi, að hommar og lesbíur gætu gengið um göturnar í friði,“ segir Þorvaldur sem segist hafa haldið í bjartsýnina. Hann segist eiga fjölmiðlum nokkuð að þakka fyrir skjótar framfarir.

„Þegar ég kom til Íslands í byrjun níunda áratugarins var að hefja störf ný kynslóð fjölmiðlafólks á öllum fjölmiðlum.“

Þetta fólk hafði tekið út þroska að miklu leyti í útlöndum og maður þurfti aldrei að biðja um athygli eða viðtal það var frekar leitað eftir okkar sjónarmiðum og skoðunum. Ég á íslenskum fjölmiðlum níunda áratugarins ýmislegt gott að þakka.“

Þorvaldur gegndi embætti formanns Samtakanna ’78 þrisvar sinnum, í þriðja skipti árið 2000 til ársins 2005. Þrjátíu árum eftir að hann kom fyrst að þessum málum kvaddi Þorvaldur starfið í samtökunum endanlega árið 2012.

Hlusta má á viðtalið við Þorvald í heild sinni hér.