Það var starf mannsins að passa upp á hana og aðra nemendur skólans, hann átti að vernda börnin gegn ógn, en það sem enginn vissi var að hann var ógnin. Hann var martröðin sem beið Tönyu þennan örlagaríka dag, 10. febrúar 1996.
Áður en Tönyu var rænt hafði verið erfitt heima fyrir. Faðir hennar, Jerry Kach, og kærasta hans, JoAnn, voru sífellt að rífast og langaði stúlkunni í frið. Hún eignaðist nýjan vin sem henni fannst hún geta talað við, Thomas Hose. Hann var 38 ára gamall og öryggisvörður í skólanum. Thomas tældi (e. groomed) Tönyu og gaf henni falskar vonir um betra líf. Hann lofaði öllu fögru og bauðst til að hjálpa henni að strjúka að heiman.
Tanya hafði áður strokið að heiman og alltaf snúið aftur. Það tók því faðir hennar fjóra daga að tilkynna hvarf hennar. Fyrst um sinn hafði Thomas ráðstafað samanstað fyrir Tönyu heima hjá vinkonu hans. Vinkonan litaði hár Tönyu og var hún þar í nokkrar vikur. Tanya segir frá því í viðtali við People að þar hafi Thomas nauðgað henni í fyrsta skipti. Hann hafði gefið henni áfengi og beðið þar til hún yrði ölvuð til að ráðast á hana.
Síðan fór Thomas með hana heim til sín þar sem hann bjó ásamt öldruðum foreldrum sínum og 22 ára syni. Hann skipaði Tönyu að yfirgefa ekki herbergi hans því enginn mátti sjá eða heyra til hennar. Hún þurfti að gera þarfir sínar í fötu og var föst í herberginu. Einu skiptin sem hún fékk að fara fram var á næturnar og þá fylgdi Thomas henni í sturtu. Það rann smám saman upp fyrir henni að hún hefði gert hræðileg mistök og myndi hugsanlega aldrei sjá fjölskyldu sína framar.
Thomas hótaði henni enn frekari ofbeldi, hann sagðist ætla að myrða hana og fjölskyldu hennar ef hún myndi reyna að flýja.
Fyrstu árin var Tanya mjög einangruð og fékk aðeins að umgangast Thomas. Fjórum árum seinna, þegar Tanya var 18 ára, taldi hann sig hafa nógu gott tak á Tönyu til að hleypa henni út, en þessi fjögur ár læst inni með honum höfðu heilaþvegið hana. Hann sagði að nú héti hún Nikki Allen og kynnti hana sem slíka fyrir foreldrum sínum. Hann sagði að „Nikki“ væri nýja kærasta hans og þau væru að hefja sambúð og hún myndi flytja inn.
Með tímanum byrjaði Thomas að treysta Tönyu meira og fékk hún vinnu í lítilli matvöruverslun. Eigendur verslunarinnar voru hjón og sá hún hvernig þau komu fram við hvort annað og hvernig heilbrigð samskipti og sambönd eru í raun og veru. Það gaf henni hugrekki að segja þeim sitt raunverulega nafn og var það upphafið að endalokum á þessari skelfilegu martröð
Hjónin hringdu á lögreglu og var Tönyu loksins bjargað, þá var hún orðin 24 ára gömul.
Thomas var sóttur til saka en fékk aðeins fimmtán ára fangelsisvist og lauk afplánun sinni fyrir þremur árum.
