Kvikmyndin The Damned, sem er innblásin af íslenskri þjóðtrú og stórbrotinni náttúru, hefur fengið frábærar viðtökur eftir frumsýningu sína í Bandaríkjunum. Þetta er fyrsta kvikmynd Þórðar Pálssonar í fullri lengd en hann skrifaði söguna ásamt handritshöfundinum Jamie Hannigan. Myndin er með 84% á Rotten Tomatoes og var tekjuhæsta nýja myndin á opnunarhelginni, sem sýnir að áhuginn á íslenskri kvikmyndagerð er að vaxa.
„Á Vestfjörðum, í afskekktri verbúð á 19. öld, þarf Eva (Odessa Young), ung ekkja, að taka erfiða ákvörðun þegar erlent seglskip strandar í firðinum,“ segir í opinberri lýsingu á myndinni. „Á hún og vinnumenn hennar að koma skipbrotsmönnum til bjargar eða vernda eigin líf og öryggi? Þjökuð af samviskubiti og ótta við ómanneskjulega hefnd, neyðist Eva og hennar fólk til að horfast í augu við skelfilegar afleiðingar gjörða sinna.“
Gagnrýnendur hafa sérstaklega hrósað kvikmyndinni fyrir hvernig hún fangar bæði fegurð og grimmd íslenskrar náttúru. Kvikmyndatökumaðurinn Eli Arenson (Dýrið) hefur skapað mögnuð myndræn áhrif þar sem snævi þaktar sléttur og kaldar fjallshlíðar verða fullkominn bakgrunnur fyrir þessa drungalegu sögu.
IndieWire skrifaði: „Þessi mynd fær þig til að finna kuldann inn að beini og enginn má missa af.“ Variety lýsti myndinni sem „ógleymanlegri blöndu af þjóðsögum, siðferðislegum álitamálum og stemningu sem lætur hárin rísa.“
New York Times segir að í „The Damned“ verður hið víðfeðma, forsögulega íslenska landslag að persónu – miskunnarlausu afli sem eykur einangrunina, sektarkenndina og hryllinginn sem mannlegar boðflennur standa frammi fyrir.
Odessa Young hefur fengið mikið lof fyrir leik sinn sem Eva, þar sem hún túlkar sektarkennd og siðferðileg átök af mikilli næmni. Joe Cole, sem leikur samstarfsmann hennar Daniel, hefur einnig hlotið hrós fyrir sterka frammistöðu. Rory McCann (Game of Thrones) og Siobhan Finneran bæta dýpt við söguna með eftirminnilegum hlutverkum.
Velgengni The Damned í Bandaríkjunum gæti opnað nýjar dyr fyrir íslenska kvikmyndagerð á alþjóðavísu. Gagnrýnendur hafa spáð því að risarnir í hryllingsmyndum, eins og A24 og Blumhouse, muni keppa um að vinna með leikstjóranum Þórði Pálssyni að framtíðarverkefnum.
The Damned undirstrikar enn fremur alþjóðlega möguleika íslenskrar kvikmyndagerðar, sérstaklega í kjölfar velgengni Lamb (Dýrið) og því ljóst að íslenskar þjóðsögur hafa mikið vægi á heimsvísu. Þetta er kvikmynd sem enginn ætti að láta framhjá sér fara en hún verður frumsýnd 30.janúar hér á landi.
