Mörg setja sér áramótaheit þess efnis að verða besta útgáfan af sjálfum sér á nýju ári. Að borða hollar, hreyfa sig, og jafnvel að finna ástina eru allt góð og gild markmið sem fylgja nýju ári. Af sömu ástæðu og líkamsræktin fyllist af fólki í byrjun janúar, má greina mikla virkni í janúar á stefnumótaforritum, eins og Smitten.

„Almennt sjáum við mesta virkni á sunnudögum, en fyrsti sunnudagurinn á nýju ári er sturlaður á Smitten. Notendur skoða sex sinnum fleiri prófíla en á hefðbundnum degi, fá þrisvar sinnum fleiri „mötch“ og fjöldi nýrra notenda tvöfaldast. Í vikurnar á eftir sjáum við svo um 35 prósent aukningu notenda sem afskrá sig vegna þess að þau hafa fundið ástina,“ segir Ásgeir Vísir, meðstofnandi og vörustjóri Smitten.

Dagana og vikurnar fram að jólum er fólk oft mjög upptekið í vinnu, jólaprófum og að undirbúa jólin, og ver meiri tíma með fjölskyldu og vinum. Því gefst oft lítill tími til þess að sinna ástarlífinu á þessum tíma. „Við gáfum út Smitten fyrir rúmlega fjórum árum síðan. Mér finnst heillandi hvað þetta er orðið fyrirsjáanlegt trend. Þetta er ekki bara á Smitten, heldur virðast öll stefnumóta-öpp finna fyrir þessu. Það er eins og öll hjörtu slái í takt og við leyfum okkur, sem mannkyn, að vona að bráðum komi betri tíð,” segir Ásgeir.

Fólk byrjar af krafti, en fæst nýársheit endast lengi vegna þess að fólk setur sér of stór markmið án þess að brjóta þau niður.

„Fyrir ástleitna á nýju ári myndi ég leggja til að búa til prófíl á Smitten í janúar og benda núverandi notendum á að uppfæra sinn prófíl ef þess þarf. Ítarlegur prófíll með að minnsta kosti fimm myndum er lykillinn að því að fá „mötch“, en það sem mörg fatta ekki er að skemmtilegur prófíll gerir öðrum auðveldara að byrja og viðhalda spjalli,” segir Ásgeir að lokum.

Smitten er með meira en 2 milljónir notenda og er aðgengilegt iPhone og Android notendum.