Parið vildi bíða með að tilkynna fæðingu barnsins en fengu engu um það ráðið þar sem Mbl greindi frá því í gær.
Tanja gagnrýnir vinnubrögð Mbl í Story á Instagram.
„Það hefur verið smá erfitt að koma þessu í orð en finnst þó svo mikilvægt að koma inn á þetta þar sem þetta er ekki í lagi“ segir hún.
„Í gær birti fréttamiðill tilkynningu um að barnið okkar væri komið í heiminn með dagsetningunni hans. Þessari tilkynningu var ég spennt fyrir að fá að segja fyrst frá en það var tekið frá mér.
Ég vakna alsæl úr lögn og fæ fullt af skilaboðum og ég skildi ekki alveg af hverju enn þá kom í ljós að miðill hafi birt á undan mér að við værum búin að eiga.“
Tanja segir að þau Ryan hafi ákveðið að greina ekki strax frá tíðindunum en þau hafi eiginlega verið tilneydd til þess eftir að Mbl birti sína frétt. „Vildum hundrað prósent bíða eftir fimm daga skoðun og vita að okkar maður væri í góðu lagi því það er okkur mikilvægast,“ segir hún.
„Ég er ekki leið og vil ekki einbeita mér að því neikvæða, enda besti tíminn okkar,“ segir Tanja.
Drengurinn fór í fimm daga skoðun í dag og fékk hann fulla einkunn. „En ég hugsa til þess hvað ef ekki hefði verið allt í lagi? Og eða jafnvel ég ekki tilbúin að deila,“ segir hún.
„Finnst þetta eiginlega óskiljanlegt og vona innilega að mín bíði afsökunarbeiðni þegar ég vakna eftir lögnina mína í dag.“
