Sýningum á þáttaröðinni Vigdís lauk á RÚV í gærkvöldi. Þættirnir sem eru fjórir segja eins og flestir vita sögu Vigdísar Finnbogadóttur sem var kjörin forseti Íslands árið 1980 og gengdi embættinu í fjögur kjörtímabil til ársins 1996.

Þættirnir hafa verið lofaðir í hástert af þeim sem horft hafa á og aðstandendur þáttanna, Vesturport, uppskorið mikið hrós fyrir. Jakob Frímann Magnússon, tónlistarmaður og fyrrum þingmaður, gengur lengra og vill að RÚV gangi frá samningi við Vesturpost um gerð árlegra þáttaraða af svipuðu tagi.

„Mikið megum við vera þakklát fyrir þá stórkostlega vel heppnuðu þætti um líf elsku Vigdísar okkar allra, sem haldið hafa okkur hugföngnum undanfarin sunnudagskvöld.
Enn ein fjöður í hatt Vesturportsfólksins sem RÚV mætti nú gjarnan ganga til samninga við um árlegar þáttaraðir af svipuðum toga – samtímasögur sem snerta okkur, mennta og skemmta í senn.“

Sjá einnig: Vigdís er aftur orðin sameiningartákn

Jakob segir að með þáttunum sé verið að svara vaxandi eftirspurn áhorfenda eftir upplifunum sem á ensku eru nefndar EDUTAINMENT – og á íslensku mætti nefna SKEMMTIMENNT.

Segir hann allt við þættina hafa smollið saman sem best mátti verða:

„Stórleikur Nínu Daggar og Elínar Hall, Eggerts Þorleifssonar, Hönnu Maríu og allra hinna, frábær handritsgerð og leikstjórn, kvikmyndataka, speglun tíðaranda í leikmynd, búningum og öðru.
Hafi þetta verkefni markað lokapunkt á farsælum ferli Skarphéðins Guðmundssonar fráfarandi dagskrárstjóra RUV, þá hlýtur þetta að vera afar gefandi hápunktur að kveðja með. Hjartanlega til hamingju aðstandendur allir, RÚV, Stefán Eiríksson og Skarphéðinn Guðmundsson! Takk fyrir okkur og meira svona!!“

Þeir sem eiga eftir að horfa á þættina um Vigdísi og þeir sem vilja horfa aftur geta nálgast þættina hér.