Lítið hefur borið á leikaranum síðan þættirnir luku göngu sinni árið 2019 og raunar hefur hann ekki tekið að sér neitt hlutverk. Hann ákvað þó fyrir skemmstu að taka að sér takmarkað hlutverk í Suits-afsprenginu Suits L.A.sem nýlega hófu göngu sína.
Í umfjöllun People kemur fram að Macht, sem er orðinn 53 ára, hafi ákveðið að flytja frá Bandaríkjunum til að hugsa um hag barna sinna. Hann og eiginkona hans, hin ástralska Jacinda Barrett, eru nú búsett utan Bandaríkjanna ásamt börnum sínum tveimur, Satine sem er 17 ára og Luca sem er 10 ára.
Eðli málsins samkvæmt eru margir aðdáendur leikarans forvitnir um hvar hann býr en hann ætlar ekki að gefa það upp. Fjölskyldan er þó sögð vera búsett einhvers staðar í Evrópu þar sem er meira næði en í Bandaríkjunum.
„Ég vil vera ósýnilegur og geri það barnanna vegna. Ég vil ekki að þeim líði óþægilega,“ segir hann. Gabriel segist ekki vera hættur að leika heldur vill hann einbeita sér að öðrum verkefnum að sinni.
Hann er hluthafi í viskífyrirtækinu Bear Fight Whiskey þar sem hann tekur meðal annars þátt í markaðssetningu og auglýsingaherferðum.
Sem fyrr segir mun hann koma fram í þáttunum Suits L.A. en hann féllst á að taka verkefnið að sér þar sem honum var boðið upp á góðan sveigjanleika í tökuáætlun fyrir þættina.
Macht ætti ekki að vera á flæðiskeri staddur fjárhagslega eftir leik sinn í Suits. Hann var einn af launahæstu leikurum þáttanna og er talinn hafa fengið 15-20 milljónir dollara fyrir þá, allt að 2,7 milljarða króna, fyrir þá 134 þætti sem hann lék í.
