Bónus tilkynnti nýjung í gær, svokallað Grísblóm sem er ísblóm með beikonbragði. Margir töldu að um aprílgabb væri að ræða en svo er hins vegar ekki. Samkvæmt tilkynningu er ísinn framleiddur í samstarfi við Emmess ís og til sölu í verslunum Bónus um land allt.

„Okkur langaði að koma viðskiptavininum á óvart og prófa að búa til ís með beikonbragði,“ segir Björgvin Víkingsson framkvæmdastjóri Bónus í tilkynningu. „Við erum alltaf að leita leiða til að gleðja viðskiptavini okkar, ekki aðeins með því að bjóða upp á ódýrar vörur heldur einnig með vöruúrvali,“ bætir hann svo við.

Hugmyndin að Grísblómi var því að vekja upp bros hjá viðskiptavinum. „Þetta er bara eitt skot, verður bara til í takmarkaðan tíma þannig að þetta er svolítið svona fyrstur kemur fyrstur fær dæmi,“ segir Björgvin.

Grísblómið er til sölu í öllum verslunum Bónus meðan birgðir endast og í gær seldust nokkur hundruð stykki.

En hvernig skyldi ís með beikonbragði svo smakkast?

„Ég held að þetta sé svona love/hate dæmi. Þetta er sætt á móti söltu. Þeir sem elska beikon munu elska þetta líka en það er um að gera að smakka bara,“ segir Björgvin að lokum og hlær.