Sólveig Anna Jónsdóttir, formaður Eflingar, segist íhuga að opna Kommaskóla fyrir lítil og stærri börn þegar hún lýkur störfum fyrir Eflingu enda hafi hún töluverða reynslu af störfum með börnum. Þetta kemur fram í skemmtilegri færslu verkalýðsleiðtogans á Facebook.
Tilefnið er mynd af föður Sólveigar Önnu sem birtist í Mogganum í vikunni.
„Þessi sæta mynd af pabba og Jónasi var í Mogganum í gær. Þegar ég var stelpa var Mogginn lesinn upphátt til að kenna mér hvað auðvald, Nató-$%&/%$ og langflestir meðlimir borgarastéttarinnar væru miklir skíthælar. Mér fannst ekki gaman í skólanum en ég elskaði upplesturinn við eldhúsborðið. Ég er viss um að skólakerfið virkaði betur fyrir fleiri börn ef að við legðum meiri áherslu á að kenna þeim að verða góðir kommar. Ég hef töluverða reynslu af starfi með börnum – kannski ég opni Kommaskóla fyrir lítil og stærri börn þegar ég hætti sem formaður. Ætla að halda áfram að leita að Rússagullinu, ég er viss um að það er niðurgrafið í Munaðarnesi, einhversstaðar ekki langt frá sumarbústöðum útvarpsins, svo að ég hafi fjármagn í skólareksturinn. Ef ég finn það ekki get ég notað tugmilljóna biðlaunin sem ég læt leysa mig út með hjá Ebbunni til að kaupa nokkrar skólastofur, nokkrar landafræðibækur og áskrift að Mogganum. Það þarf ekki mikið meira í kennsluna,“ skrifar Sólveig Anna.
