Uppátæki kattarins Diego vekja alltaf mikla athygli enda óumdeilt að um er að ræða frægasta kött landsins. Diego er vinsæll á samfélagsmiðlum og nú er myndband af kettinum í mikilli dreifingu á Tiktok þar sem hann sést gæða sér á músargreyi í verslun Hagkaupa í Skeifunni fyrir framan viðskiptavini búðarinnar.

Rétt er að vara viðkvæma við myndbandinu, sem sjá má hér fyrir neðan, enda étur Diego músina af áfergju.

Mikið uppnám varð fyrir jól þegar óprúttinn aðili stal kettinum. Eigandi kattarins lét þá vita að hann hefði ekki skilað sér heim og svo fór að ekkert spurðist til hans í rúmlega einn og hálfan sólarhring samhliða sögum um að maður hefði sést taka hann og fara með hann í strætó. Að endingu fannst Díegó heill á húfi og var síðan skilað til eiganda síns, aðdáendum hans til mikillar gleði. Kötturinn hélt síðan uppteknum hætti og fór að mæta í verslunarinnar Hagkaup og A4 í Skeifunni þar sem hann virðist kunna afar vel við sig.

Hér má sjá myndbandið af Diego:

@skuli.hilmarsson♬ Funny – Gold-Tiger