Kristjana ræðir um þetta ævintýri í nýjasta þætti af Fókus, spjallþætti DV.
Horfðu á þáttinn hér að neðan eða hlustaðu á Spotify og öllum helstu hlaðvarpsveitum.
Í febrúar sagði Kristjana upp vinnunni sinni til tæplega fimm ára. „Ég lærði þar mjög margt en ég fann að ég var tilbúin að taka næsta skref, aðeins að hoppa út í djúpu laugina og fara all in í frumkvöðlabransann og stofna fyrirtæki,“ segir hún.
Kristjana viðurkennir að þetta sé í senn spennandi og krefjandi. „En ég vissi alltaf að ég væri að fara út í sjálfstæðan rekstur einhvern tímann.“
Kristjana og Gummi hafa verið að vinna saman síðan síðasta sumar, en þá hóf hún störf sem umboðsmaðurinn hans. Samstarfið hefur gengið vonum framar, hún stökk á vagninn með hlaðvarpið Tölum um og voru þau að koma Atelier Agency á laggirnar á dögunum.
„Atelier þýðir vinnustofa á frönsku, þetta er oft notað um rými eða hópa af listafólki,“ segir hún.
Kristjana og Gummi kynntust síðasta vor við framboð Höllu Tómasdóttur, en Kristjana var í samfélagsmiðlateymi forsetans.
„Við fundum að við vorum að gera hlutina aðeins öðruvísi en fólk bjóst við og þannig fundum við að það er vöntun fyrir fleiri umboðsskrifstofur. Og kannski okkar sérstaða er að okkur langar að búa til samfélag af áhrifavöldum sem geta unnið saman og stutt hvert annað,“ segir Kristjana.
Hver sem er getur orðið að áhrifavaldi að hennar sögn, þú þarft bara að vera tilbúin að leggja vinnuna á þig. „Maður þarf að gera sér grein fyrir því hvað þetta er mikil vinna, en ef þú setur vinnuna inn þá mun þetta alltaf ganga upp,“ segir hún.
Kristjana býr yfir víðamikilli reynslu úr ýmsum áttum. Hún kláraði iðnaðarverkfræði og tölvunarfræði við Háskóla Íslands og bætti svo við sig meistaragráðu í iðnaðarverkfræði. Kristjana var mjög virk í félagslífinu í skóla og hefur setið í ótal nefndum, samtökum og stjórnum, bæði í námi og eftir það.
„Ég hef lítið verið í námi tengt markaðsmálum en alltaf haft áhuga á því,“ segir Kristjana, sem fékk að spreyta sig í öllum þeim fjölbreyttu verkefnum sem hún hefur sinnt í gegnum árin.
„Í tölvunarfræðinni stofnaði ég Hakkaþon með vinkonum mínum sem er nýsköpunarkeppni sem fer fram á mjög stuttum tíma með fókus á tækni. Þar kynntist ég frumkvöðla-, nýsköpunarheiminum og það á rosa vel við mig. Mikill hraði, mikið stuð, mikið gaman, mikið af hugmyndum. Við stofnuðum líka Ada, félag kvenna í upplýsingatækni.“
Kristjana ræðir nánar um Atelier Agency, áhrifavaldabransann á Íslandi og hvert hún telji hann vera að stefna í þættinum. Horfðu á hann hér að ofan eða hlustaðu á Spotify.
Fylgstu með Kristjönu á Instagram, TikTok eða LinkedIn. Hún heldur einnig úti vefsíðunni barddal.is.
Hlustaðu á hlaðvarpið Tölum um á Spotify og til að kynna þér Atelier Agency smelltu hér.
