Óskarsverðlaunin voru veitt í 97. sinn í gærkvöldi  í Dolby Theatre í Los Angeles. 

Bandaríski leikarinn Adrien Brody hreppti Óskarinn fyrir besta leik í aðalhlutverki fyrir hlutverk sitt í The Brutalist.

Þegar Brody var byrjaður að ganga upp tröppurnar á sviðið og sendandi kossa til áhorfenda í salnum áttaði hann sig á því að hann var enn með jórturleðrið í kjaft. Hann tók það út og sneri við og ætlaði aftur í sætið sitt, óviss með hvað hann ætti að gera við tyggjóið.

Kærasta hans, leikkonan og tískuhönnuðurinn, Georgina Chapman, var fljót að koma honum til bjargar og kom hlaupandi að sviðinu með útréttar hendur.  Brody henti tyggjóinu í átt til hennar, en hitti ekki. 

Áhorfendur voru ekki sáttir og létu skoðun sína í ljós á X:

„Þú ert nýbúinn að vinna Óskarinn, af hverju ekki að setja tyggjóið í vasann á smókingnum?“

Annar sagði að staða hjá Chapman í að velja góða menn væri 0-2 og vísaði þar til fyrrum eiginmanns hennar, fyrrum kvikmyndaframleiðandans Harvey Weinstein sem ákærður var og dæmdur fyrir fjölda kynferðisbrota.

Sumir aðdáendur hvöttu Brody hins vegar til að giftast Chapman og tóku fram að parið hlyti að elska hvort annað fyrir að vilja redda hvort öðru í þessum aðstæðum.

Brody tók sér síðan góðan tíma í þakkarræðu sína, og þverneitaði að hætta, þegar tónlist byrjaði að hljóma sem gefur vinningshöfum til kynna að þeir hafi látið móðan mása yfir tilsettan tíma. Hann sussaði einfaldlega í hljóðnemann og sagðist kunna þetta og hafa gert áður, tónlistin þagnaði og Brody kláraði sitt mál.