Jóhannes Haukur Jóhannesson fer með hlutverk í væntanlegri kvikmynd Marvel, Captain America: Brave New World, þar sem hann leikur málaliða sem starfar náið með Seth Voelker/Sidewinder sem leikinn er af Giancarlo Esposito.
Myndin er sú fjórða í Captain America-röðinni frá Marvel og sú fyrsta með Anthony Dwane Mackie í aðalhlutverkinu sem ofurhetjan Kafteinn Ameríka. Meðal annarra leikara eru Harrison Ford, Liv Tyler og Tim Blake Nelson.
Í lok nóvember birti Jóhannes mynd af plakati myndarinnar og sagði að það hefði nú verið fallegt að smella honum þar og þakkaði krökkunum hjá Marvel fyrir að stafa nafnið sitt rétt.
View this post on Instagram
Hann sagði þó við Vísi að hann vonaðist til að vera ekki klipptur út úr myndinni, hann hefði ekki birst í neinni stiklu fyrir kvikmyndina og þar að auki var nafn hans ekki skráð við myndina á vefsíðunni Imdb.com sem er biblía kvikmyndabransans.
Jóhannes var ekki hluti af leikhópnum sem tók þátt í upprunalegu tökunum árið 2023 og sagðist hann við Vísi hafa komið bakdyramegin inn í verkefnið en hann bættist við stóran hóp leikara í myndinni þegar að nokkrum atriðum var bætt við sumarið 2024 og önnur atriði voru tekin upp aftur (e. reshoots).
„Ég fór reyndar um daginn, ég var í London, og var sendur í svona ADR, til að laga hljóð og þá sá ég nú smá bút og samkvæmt því þá hangi ég enn inni. Maður veit aldrei og sérstaklega með Marvel. Þeir eru þekktir fyrir að krukka vel og lengi í myndunum sínum svo að maður bara mætir á frumsýningu og vonar að maður sé þarna að einhverju leyti,“ sagði Jóhannes sem svaraði játandi að hann léki á móti aðalleikaranum, Anthony Mackie.
Samkvæmt glænýrri stiklu virðist sem Jóhannes verði svo sannarlega á stóra tjaldinu en í stiklunni má sjá hann sýna Mackie hvar Davíð keypti ölið.
Nafn Jóhannesar er einnig komið við myndina á imdb.com og þar má sjá að hann leikur persónuna Copperhead.
Myndin verður frumsýnd hér á landi 13. febrúar.
