Tilnefningarnar eru þrettán talsins en þykir athyglisvert að kvikmynd með svona margar tilnefningar sé með svona lága einkunn á kvikmyndasíðum. Hún er til að mynda með 6 á IMDB og 74 prósent hjá gagnrýnendum á Rotten Tomatoes og 22 prósent meðal áhorfenda á RT.
Emilia Pérez er söngleikjamynd um mexíkóskan eiturlyfjabarón sem er í kynleiðréttingarferli.
„Mér finnst það alveg stórmerkilegt að myndin Emilia Pérez sé að fá svona mörg verðlaun og góða dóma. Hún er alveg agaleg – alveg það agaleg að ég fékk aulahroll yfir því hversu margar öskrandi og niðrandi stereótýpur eru í henni um trans konur og konur almennt. Hún er eiginlega það slæm að ég var í hálfgerðu hláturskasti yfir henni þegar ég horfði á hana með vini mínum,“ sagði Ugla Stefanía í pistli á Facebook.
„En hún virðist vera að slá rosalega í gegn – sem mér finnst vera gott merki um það hversu stutt á veg við erum raunverulega komin þegar kemur að hugmyndum fólks um trans konur. Finnst fólki þetta virkilega vera góð birtingarmynd? Svona í alvöru?“
Ugla Stefanía segir að auðvitað geti trans fólk verið allskonar. „Eins og við öll, en ég held að við þurfum nú ekki á því að halda að söguþráður snúist um trans konu sem er ofbeldisfullur eiturlyfjabarón sem lýgur að öllum – meðal annars konunni sinni og börnum. Á þessum tímapunkti er myndin bara að styrkja allar helstu mýtur og skaðlegu viðhorf sem fólk hefur í samfélaginu,“ segir hún og bætir við að lokum:
„Finnst bara eiginlega eins og árið sé 2007.“
