Aisleyne, sem gerði garðinn frægan í Big Brother UK í sjöundu þáttaröð, ræddi um málið við tímaritið Closer. Hún sagði að hún hafi þyngst um rúmlega tólf kíló eftir að besta vinkona hennar dó. Hún segir að hún hafi verið á mjög dimmum stað og hafi í kjölfarið þyngst hratt. Hún hafi því ákveðið að prófa Ozempic til að léttast en í stað þess að fara til læknis hafi hún verslað lyfið á svarta markaðinum.
Sjá einnig: Læknir varar við ógnvekjandi nýrri aukaverkun af notkun Ozempic
Lyf á borð við Ozempic og Wegovy hafa verið mikið á milli tannanna á fólki að undanförnu og það ekki að ástæðulausu. Um er að ræða þyngdarstjórnunarlyf sem upphaflega voru þróuð fyrir þá sem þjást af sykursýki en hafa gagnast öðrum í baráttu við aukakílóin.
Undanfarið hafa vinsældir lyfjanna aukist gríðarlega og virðast æ fleiri leita í lyfið fyrir þyngdartap, jafnvel þegar það er ekki þörf á því fyrir heilsuna, eins og í tilfelli Aisleyne.
Um tíma náði Novo Nordisk, framleiðandi Ozempic, ekki að fylgja eftirspurn og komu í kjölfarið nokkur lyf á svarta markaðinn, eins konar falsaðar útgáfur af Ozempic, sem hafa haft hræðileg áhrif á heilsu fólks.
„Ég ætla að vera alveg hreinskilin og ég er ekki stolt, en ég keypti Ozempic á svarta markaðinum,“ sagði Aisleyne við Closer.
„Ég hef örugglega fengið slæman skammt því líkaminn minn brást svo illa við. Í þrjá daga hélt ég að ég væri að fara að deyja. Ég lá uppi í rúmi, vaknaði til að kasta upp, var með niðurgang og sofnaði svo aftur. Á einum tímapunkti var ég með þrjá poka fulla af ælu við hliðina á rúminu mínu. Ég var orðin svo óttaslegin, ég byrjaði að missa sjónina, ég gat ekki einu sinni séð símann minn og hafði ekki hugmynd um hvað myndi verða um mig.“
Þrátt fyrir að vera hætt komin sótti Aisleyne sér ekki læknisaðstoðar, hún segir að hún hafi skammast sín of mikið.
„Mér leið illa að sóa tíma heilbrigðiskerfisins þar sem ég gerði mér þetta sjálf,“ sagði hún.
En sjónvarpsstjarnan ákvað að stíga fram og segja sögu sína til að vara aðra við. „Mín skilaboð eru: Ekki gera þetta. Ég dó næstum því út af þessu. Það er ekki þess virði að deyja bara til að missa nokkur kíló. Ekki stytta þér leið þegar kemur að heilsunni og ekki kaupa lyf af svarta markaðinum, því þú hefur ekki hugmynd um hvað er í því.“
