Leik- og sjónvarpskonan Drew Barrymore lætur ekki slá sig út af laginu. Ekki einu sinni þegar hún komst að því að þáverandi maki hafði verið henni ótrúr. Hún lýsti því í spjallþætti sínum í gær hvernig hún brást við.

„Þetta var fyrir einhverjum áratugum síðan. Ég tók allt draslið sem hann hafði heima hjá mér og tróð því inn í bílinn hans. Síðan rúllaði ég bílnum niður innkeyrsluna hans, skildi hann þar eftir og gekk burt. Síðan fékk ég stelpuna sem hann hélt fram hjá mér með til að hitta mig í drykk á meðan hann sat og fylgdist með. Ég sagði: Þú ætlar að sitja þarna og þú ætlar að hlusta á okkur tvær tala saman. Svo haltu kjafti og hlustaðu. Síðan skutlaði ég honum heim, horfði á hann og sagði: Snáfaðu. Það er þó rétt að taka fram að hann er ástkær vinur minn í dag. Við vorum bæði ung og vitlaus. Ég gerði líka mín asnastrik.“

Barrymore tók fram að eftir að henni var runnin reiðin hafði hún samband við sinn fyrrverandi og sagði meðal annars: „Við vorum bara krakkar. Ég gerði líka mistök og við erum bara mennsk og það var svo margt sem ég elskaði við þig. Getum við verið hluti af lífi hvors annars?“