Athafnakonan og áhrifavaldurinn Lína Birgitta Sigurðardóttir glímdi við mikla verki og vanlíðan í mörg ár. Hún man eftir að hafa farið fyrst til læknis vegna verkjanna þegar hún var sex ára en fékk þá vitlausa greiningu.

Það var ekki fyrr en árið 2013 að hún fékk rétta greiningu en þrátt fyrir léttinn að vita loksins hvað amaði að þá var þessi tími mjög erfiður sökum mikilla veikinda. Við tók lyfjagjöf á sex vikna fresti næsta áratuginn en athafnakonan ákvað að hætta á lyfjum fyrr á árinu og prófa heildræna nálgun.

Lína Birgitta er gestur vikunnar í Fókus, spjallþætti DV, og ræðir um málið í spilaranum hér að neðan. Brotið er hluti af nýjasta þætti af Fókus sem má horfa á í heild sinni hér eða hlusta á Spotify.

Lína Birgitta fór fyrst til læknis vegna verkjanna þegar hún var sex ára. Þá var sagt að hún væri með latan ristil. Þegar hún varð eldri versnaði heilsan og í kringum tvítugt var hún mjög slæm.

„Ég var búin að vera mjög veik og greindist svo árið 2013 með Crohns sjúkdóm,“ segir hún. Crohn’s sjúkdómur er svæðisgarnabólga (l. enteritis regionalis) sem tilheyrir flokki langvinnra bólgusjúkdóma í þörmum.

Eins og fyrr segir tók langan tíma að fá rétta greiningu en árin fyrir leitaði hún reglulega til lækna og fékk alltaf vitlausa meðferð. Læknar héldu að hún væri með sýkingu í ristli eða maga.

„Ég var búin að fara svo rosalega oft til læknis en það var alltaf gefið mér sýklalyf sem er það versta sem þú færð. Það er eins og varpa kjarnorkusprengju í kerfið. Svo var mér oft sagt að taka íbúfen, en ég má til dæmis ekki taka íbúfen. Allt sem mér var gefið var allt sem ég átti ekki að fá.“

Flutt á sjúkrahús

Tíminn í kringum greiningu reyndist Línu Birgittu mjög erfiður. „Þetta var ógeðslegur tími. Ég var inn og út af spítalanum, alveg svakalega veik. Þetta var viðbjóðslegur tími,“ segir hún.

Lína Birgitta var orðin mjög veik heima hjá sér þegar hún var flutt með sjúkrabíl á Landspítalann. Næsta dag fékk hún loksins greininguna. „Það er mjög erfitt að greina þennan sjúkdóm. Eftir greiningu tók við lyfjagjöf,“ segir hún.

Athafnakonan var í rúman áratug á lyfjum, sem innifól lyfjagjöf á Landspítalanum á sex vikna fresti.

„Ég er nýhætt á lyfjunum, ég tók ákvörðun um að hætta á lyfjum og vil lækna mig heildrænt. Ég er meira þar í dag,“ segir hún og bætir við að hún sé ekki á móti lyfjum enda hafi þau hjálpað þegar hún þurfti á þeim að halda.

Lína Birgitta ræðir þetta nánar í spilaranum hér að ofan. Brotið er hluti af nýjasta þætti af Fókus sem má horfa á í heild sinni hér eða hlusta á Spotify.