Myndband af manni sem stekkur ofan í litla laug og kemur ekki aftur upp hefur valdið fólki heilabrotum. Óttast margir um afdrif mannsins.
Myndbandið var birt á samfélagsmiðlinum X (áður Twitter). Í því má sjá mann sem virðist af asísku bergi brotinn stökkva í sundskýlu ofan í þrönga laug eða hyl neðan við kletta. Sekkur hann ofan í hylinn og kemur ekki aftur upp. Milljónir hafa horft á myndbandið.
Þrjár aðrar manneskjur standa við bakkann og horfa á eftir honum. Nokkuð virðist um ólgu eða loftkúlur í vatninu og reyna þau að hrinda þeim frá til að sjá ofan í.
Where did he go??? Is he ok? pic.twitter.com/rtNRK54gO9
— non aesthetic things (@PicturesFoIder) September 8, 2024
Nefna sumir netverjar að maðurinn hefði átt að koma upp eftir aðeins nokkrar sekúndur, kannski fjórar eða fimm. Myndbandið er hins vegar sextán sekúndna langt og ekkert bólar á honum. Nefnt er hins vegar að fólk geti haldið andanum mun lengur en það.
Aðrir geta sér til um hvort að um sé að ræða göng og hann hafi komið upp annars staðar. Hinir svartsýnustu óttast hins vegar um að hann hafi hreinlega sokkið til botns og ekki komist upp aftur.