Bandaríski tónlistarmaðurinn Sean „Diddy“ Combs gæti átt þungan fangelsisdóm yfir höfði sér vegna gruns um mansal og skipulagða glæpastarfsemi. Rapparinn var handtekinn í New York á mánudag eftir að niðurstaða ákærudómstóls lá fyrir. Fyrr á þessu ári gerði bandaríska alríkislögreglan, FBI, allsherjar leit á heimilum hans og áður hafði fyrrverandi kærasta hans, Cassandra Venture, stigið fram og sakað hann um ítrekuð kynferðisbrot og ofbeldi.
Sjá einnig: Skuggaleg hegðun Sean Combs:Margra daga orgíur, barnaolía í lítravís og vökvi í æð
Málið hefur vakið mikinn óhug og eru margir að skoða gamalt myndefni af Diddy. Rapparinn var þekktur fyrir frægu „hvítu partýin“ sín, þar sem gestir mættu í hvítum klæðum. Veislurnar voru vinsælar hjá stjörnunum og vel sóttar.
Gamalt myndband frá einni slíkri veislu hefur verið dregið fram í sviðsljósið, en það er einn hlutur í bakgarðinum sem hefur vakið óhug hjá fólki. Í myndbandinu má sjá risastórt hvítt rúm í bakgarðinum, en nú velta margir fyrir sér hvað hafi gerst í þessu rúmi.
Diddy er sagður hafa kallað kynlífspartýin sín „freak offs.“ Daily Mail vísar í gögn frá ákæruvaldinu sem virðast sýna vægast sagt syndsamlegt líferni kappans. Hann er sagður hafa haldið fjölmargar orgíur þar sem vændiskonur, eiturlyf og barnaolía í lítravís komu meðal annars við sögu.
Hann er sagður hafa borgað flug undir vændiskonur frá öllum heimshornum til að taka þátt í kynsvallsveislum sem stundum stóðu yfir í nokkra daga. Diddy er sagður hafa skipulagt þessar veislur og stýrt þeim og meðal annars „stundað sjálfsfróun“ á meðan á þeim stóð. Á sama tíma er hann sagður hafa útvegað þessum konum fíkniefni á borð við ketamín og MDMA og efni sem kallast BHB sem á meðal annars að auka úthald.
