Niðurstaða dómstólsins var að hún hefði með köldu blóði myrt sjö kornabörn og reynt að myrða sex til viðbótar á fyrirburadeild sjúkrahúss í Chester þar sem hún starfaði.
Nú hins vegar efast einhverjir um sekt Lucy. The New Yorker birti þrettán þúsund orða grein sem hefur vakið upp spurningu um hvort Lucy hafi í raun myrt börnin.
Sjá einnig: Lucy var dæmd fyrir að hafa myrt sjö kornabörn – Nú er spurt hvort hún sé í raun saklaus
Móðir barns, sem Lucy var dæmd fyrir að hafa orðið að bana, segir að orð Lucy við hana, á meðan barn hennar var að deyja, ásæki hana og sýni fram á sekt hennar.
Konan var á spítalanum og vakin um miðja nótt og látin vita að ástand sonar hennar væri slæmt. Það var farið með hana á fyrirburadeildina þar sem hjúkrunarfræðingar reyndu endurlífgun.
Á meðan því stóð spurði einn hjúkrunarfræðingur hana: „Viltu að ég hringi í prest?“
„Þó svo að ég væri í þessum aðstæðum, að það væri verið að reyna endurlífgun á syni mínum, þá var ég enn svo rugluð og vissi ekki hvað væri í gangi, og mér var ekki búið að detta í hug – fyrr en hún spurði mig – að það væri möguleiki að hann myndi deyja,“ sagði konan við opinbera rannsókn málsins.
„Ég spurði hana, ég sagði: „Heldurðu að hann sé að deyja?“ Og hún sagði: „Já, ég held það.“ Á þeim tíma, þú veist, eins og ég segi, ég vissi ekki hvað hún hét og ég hafði aldrei séð hana áður. En ég trúi því að þetta hafi verið Lucy Letby.“
Letby var dæmd fyrir að hafa myrt drenginn þegar hann var fjögurra daga gamall með því að sprauta lofti í maga hans, í gegnum næringarslönguna, í júní árið 2015. Drengurinn fæddist tíu vikum fyrir tímann og þó hann hafi verið lítill þá var talið að hann myndi lifa, og kom það því læknum verulega á óvart þegar ástand hans snarversnaði.
