Systir Oasis-bræðra, þeirra Noel og Liam Gallagher, hefur stigið fram og lýst þvi hvernig bræðurnir heimsfrægu vilja ekkert af henni vita. Emma Davies, sem er 51 árs gömul, fæddist aðeins nokkrum mánuðum á eftir Liam og ólst upp í hverfinu sem bræðurnir bjuggu í.

Faðir bræðranna, Tommy Gallagher, var ekki við eina fjölina felldur og hélt framhjá eiginkonu sinni Peggy, með nágrannakonunni June, móður Emmu. June hafi ekki vitað að Tommy væri giftur og hann hafi sett á svið leikrit til að hylja slóð sína.

Emma hafði ekki hugmynd um bræður sína fyrr en hún var 23 ára gömul og fékk að vita sannleikann. Þá tröllreið plata Oasis-bræðra, (What´s the story)- Morning Glory vinsældarlistum heimsins og keypti Emma sér eintak. Í kjölfarið sagði móðir hennar frá því hver faðir hennar væri og hitti hún í kjölfarið Tommy Gallagher.

„Ég vissi að faðir minn átti önnur börn en ekki hver hann var,“ segir Emma.

Endurfundir þeirra voru tilfinningaþrungnir en Emma kveðst þó, í viðtali við Daily Mail, ekki hafa heyrt í föður sínum í 18 ár.

Emma hefur aldrei hitt bræður sína heimsfrægu en segist gjarnan vilja kynnast þeim. Hún sagðist hafa verið tvístígandi með að hafa samband og talið öruggt að þeir myndu telja að hún væri einhverskonar brjálæðingur. Því ákvað hún að stíga fram í viðtali í von um að það myndi koma hlutunum á hreyfingu.

Sonur hennar, og þar með náfrændi Gallagher-bræðra, er mikill aðdáandi Oasis og hann reyndi á dögunum að tryggja sér miða á endurkomu tónleika þeirra á næsta ári. Hann hafi, eins og svo margir, hins vegar ekki náð í gegn og því misst af því tækifæri að sjá frændur sína á sviði.

Emma segir í viðtalinu að hún hafi einu sinni verið nærri því að hitta Liam. Hann hafi dvalið sem gestur eina nótt á hóteli sem hún starfaði á, ásamt þáverandi eiginkonu sinni Patsy Kensit. Hún hafi verið að íhuga að kynna sig en ekki kunnað við það. Þegar Liam yfirgaf hótelið hafi hann skilið eftir bol og geisladisk með Bítlunum sem herbergisþerna hótelsins hafi gefið henni í kjölfarið. Segist Emma enn eiga munina og haldi mjög upp á þá.