Simmi segir söguna í nýjasta þætti af hlaðvarpinu 70 mínútur. Hann og Hugi Halldórsson, hinn stjórnandi þáttarins, voru að ræða um morfín.
„Ég hef einu sinni fengið morfín, þegar ég fékk morfínið sagði ég bara já við miðju soninn um að fá gat í eyrað,“ segir Simmi.
Þetta var eldsnemma um morguninn og fáir á ferð.
„Stefán [Eggertsson] læknir, pabbi hans Óla Stef, hann kom mér til bjargar,“ segir Simmi.
„Þetta var ekki brjósklos þetta var útbungun en nóg til að ég lamaðist fyrir neðan mitti á stigavélinni í World Class í Laugum. Klukkan var 6:15 um morguninn og það var bara Ívar Guðmundsson og Stefán læknir þarna.“
Simmi man meira að segja hvaða dag þetta var, þann 18. júní, þar sem hann og þáverandi eiginkona hans áttu brúðkaupsafmæli og ætluðu út að borða um kvöldið. Simmi hafði skilið eftir símann sinn í búningsklefanum og gat því ekki hringt í hana til að láta vita hvað hafði gerst. En hún frétti það fljótlega.
Ívar tilkynnti fylgjendum sínum á samfélagsmiðlum stöðu mála.
„Ívar Guðmundsson póstaði þessu á Snapchat, Instagram eða Facebook eða eitthvað, þar sem ég ligg þarna,“ segir Simmi.
Í kjölfarið birti DV frétt um málið og þannig komst barnsmóðir Simma að því að hann væri ekki á leiðinni út að borða með henni. Miðju sonurinn fékk þó sínu framgengt og mætti aftur seinna um daginn á sjúkrahúsið með lokk í eyranu.
