„Hvaða rákir eru þetta sem standa aftan úr þotum og flugvélar, sem þekja himininn? Er þetta einfaldlega saklaust samanþjappað loft og raki eða eru einhverjir illa innrættir fantar og fúlmenni, með annarlegar hvatir, mögulega að dreifa einhverjum hroðbjóði í andrúmsloftið? Ef svo er, hverju er verið að spreyja og hversvegna?“
Framangreint er lýsing á nýjasta þætti hlaðvarpsins Álhatturinn þar sem teknar eru fyrir þekktar og óþekktar samsæriskenningar og þær krufðar af léttúð. Að þessu sinni er horft til þekktrar samsæriskenningar þar sem horft er til himins. Þessar línur sem við sjáum á himninum og okkur er sagt að stafi frá þotum og flugvélum – hvers vegna verða þessar línur til og getur verið að ekki sé allt sem sýnist?
Álhattar velta því fyrir kenningum um að meint fúlmenni sem gangi erinda lyfjarisa og tryggingafélaga, standi fyrir efnarákunum og þeim dreift um heiminn til að veikja fólk og skapa þannig hagnað. Enda ljóst að þarna er um að ræða þær atvinnugreinar sem helst græða á veikindum fólks eða ótta þeirra við veikindi. Svo er mögulegt að hér sé klassískt dæmi um sturlaða vísindamenn með mikilmennskubrjálæði sem freista þess að ná tökum á sjálfu veðrinu og vilja drottna yfir náttúrunni.
Samsærið um efnarákirnar er ekki nýtt af nálinni og virðist hafa dreift nokkuð vel úr sér um heiminn, enda hafa þessar rákir sést á himninum á flestum stöðum.
„Ef um samsæri er að ræða, þá er væntanlega um eitt stærsta og umfangsmesta samsæri veraldar að ræða. Hversu margir eru með í ráðum? Allir flugmenn, flugumferðarstjórar, hleðslu fólk á jörðu niðri? Eða er kannski samsærið einnig falið fyrir þeim öllum? Má jafnvel vera að leynilegum eiturefnum sé blandað í flugvélabensínið án vitneskju eða aðkomu starfsmanna flugfélaganna eða flugvallanna?“
Hvað með tilraunir á árum áður til að ná tökum á veðrinu? Verkefni eins og Cirrus-verkefnið, og síðar Stormfury, þar sem Bandaríkin reyndu að draga úr krafti fellibylja með því að fljúga inn í veðurfyrirbærið og losa þar fyrst þurrís og síðar silfurjoð á árunum 1947 fram til 1983. Eða verkefnið Cumulus á sjötta áratugnum þar sem bresk yfirvöld könnuðu hvort mögulegt væri að ráðskast með veðrið.
„Hvers vegna myndu stjórnvöld og vísindamenn vilja stjórna veðrinu og hverra hagsmuna er þá verið að gæta? Almennings, markaðarins eða jafnvel hulduaflanna? Opinberu skýringarnar eru af fremur skornum skammti og þær eru flestar frekar óræðar. Mögulega má koma í veg fyrir þurrka og uppskerubrest og þannig hugsanlega einnig koma í veg fyrir kreppur og ef til vill afstýra byltingum og óeirðum.“
Þessar hugleiðingar kalli á enn dýpri skoðun. Ef valdhafar ná tökum á veðrinu þá gætu hugsanir almennings verið á dagskrá þeirra líka. Og ef allskonar efni eru notuð til að reyna að hafa áhrif á veðrið, hvaða áhrif hefur það á mannfólkið þegar þessum efnir rignir svo yfir byggt ból.
„En hvað ef þau eru ekki bara að reyna stjórna veðrinu? Geta þau kannski stjórnað hugsunum okkar og gjörðum með þessum efnum? Hverju eru þau að spreyja og hvaða heilsufarsleg áhrif hefur það á fólk, plöntur og dýr? Eru ál, baríum og brennisteinn í snefilmagni raunverulega skaðleg og ástæða þess að svo gífurleg aukning hefur orðið í tilfellum krabbameina og alzheimers í heiminum? Eða hefur það kannski meira með hækkandi aldur og auknar lífslíkur fólks að gera?
En hver veit nema þetta sé bara enn ein tilraun voldugrar valdaklíku og auðjöfra til þess að auðgast enn frekar og færa auðæfi heimsins á enn færri hendur? Væri það ekki fullkomin leið fyrir fégráðuga jakkafatalakka til þessa að misnota markaðinn, ef þeir gætu séð fyrir hvaða hrávörur verða af skornum skammti og munu hækka í verði? Hver hefur árangur allra þessara veðurstjórnunartilrauna verið og hversu áreiðanleg eru þessi vísindi? Ef Jakob Frímann gat komið í veg fyrir rigningu á Secret Solstice geta þá ekki Pútín og félagar gert slíkt hið sama? Eða Bandarísk yfirvöld
Hvað í veröldinni er skýja sáning (e.cloud seeding)? Hver eru Council of foreign relations og hvers vegna í veröldinni vilja þau samtök dimma himininn? Getur verið að hér sé hugsanleg lausn á loftslagsvánni og hamfarahlýnun? Eða eru hér á ferðinni gífurlega valdamikil hagsmunasamtök sem bera einungis eigin hag í húfi?“
Loks er vikið að athyglisverðri fullyrðingu sem samsæriskenningasinnar halda fram um efnarákirnar. Að himininn sé að missa blámann sinn og að valdhafar stundi sögufölsun til að sannfæra almenning um að efnarákir séu eðlilegar.
„Er himinn raunverulega að verða minna blár og sífellt grárri og grárri eins og sumt fólk heldur fram og hafa Disney átt við gamlar teiknimyndir sínar til þess að falsa efnarákir í þær? Eða er þetta allt saman einn stór blekkingarleikur og sýndarmennska sett fram til þess að afvegaleiða umræðuna og gera alla álhatta tortryggilega og samsæriskenningar ótrúverðugar? Eru kenningarnar um efnarákir leynilega settar fram af yfirvöldum með það að markmiði að sannfæra okkur almenning um að allar samsæriskenningar séu glórulaus þvæla sem ekkert mark sé takandi á?
Þetta og svo margt, margt fleira áhugavert í þessum nýjasta þætti af Álhattinum, sem er sneisafullur af bitastæðu efni, þar sem þeir félagar Guðjón Heiðar, Haukur Ísbjörn og Ómar Þór ræða þá stórkostlega skemmtilegu og áhugaverðu kenningu að efnarákum (e.chemtrails) sé skipulega úðað í andrúmsloftið með annarleg markmið að leiðarljósi.“
