Páll Magnússon forseti bæjarstjórnar Vestmannaeyja og fyrrverandi útvarpsstjóri og alþingismaður sagði í gærkvöldi á Facebook-síðu sinni frá ferð í apótek sem endaði með óvæntum endurfundum hans við konu nokkra sem sagðist hafa hitt hann síðast fyrir hartnær hálfri öld:
„Lítil saga: Ég var að koma út úr apóteki í Reykjavík í gær, settist inn í bíl og startaði. Þá er bankað á rúðuna bílstjóramegin og fyrir utan stendur góðleg og gáfuleg kona. Ég renndi rúðunni niður og konan sagði: „Sæll Páll og afsakaðu – en ég hitti þig síðast fyrir nærri hálfri öld í búð niðri í miðbæ. Þú varst að kaupa þér skó og mér fannst svo fallegur kassinn sem var utan um þá og spurði hvort ég mætti eiga hann. Þú sagðir að það væri sjálfsagt mál, tókst skóna upp úr kassanum og réttir mér hann“.“
Páll virðist ekki hafa munað eftir atvikinu eða kannast mikið við konuna en hún vildi gefa honum gjöf í þakkarskyni:
„Að þessu sögðu dró konan upp lítinn bunka af kortum úr tösku sinni og rétti að mér: „Nú vil ég að þú veljir þér þrjú af þessum kortum sem ég málaði sem laun fyrir kassann.“ Ég vissi ekki hvaðan á mig stóð veðrið en gerði þó eins og konan sagði. „Þetta er vel valið hjá þér“, sagði hún, „Og mér finnst gaman að geta launað þér kassann þótt seint sé,“ ,bætti hún við brosandi og kvaddi.
Með færslunni, sem sjá má hér að neðan, birtir Páll myndir af kortunum og segir að þau og hin ónefnda kona hafi gert daginn góðann.
