Lygilega stór hluti af internetinu er notaður undir myndbönd af köttum. Þessum loðnu og fyndnu ferfætlingum sem eru krúttaralegri en flestar aðrar lífverur.

Algengt er að finna myndbönd af köttum sem verða vitstola af hræðslu þegar þeir sjá agúrku. Sérstaklega ef agúrkunni er laumað fyrir aftan köttinn.

En hvers vegna eru kettir svo hræddir við agúrkur?

Í tímaritinu National Geographic er fjallað um þennan undarlega ofsaótta katta og rætt við dýraatferlisfræðinginn Jill Goldman.

„Kötturinn sýnir viðbragð þegar honum bregður og reynir að komast eins fljótt úr aðstæðunum og hann getur. Síðan metur hann stöðuna úr hæfilegri fjarlægð,“ sagði Goldman.

Hún segir að það geti einnig ruglað ketti í ríminu þegar agúrkur eru settar nálægt þeim stað þar sem þeir éta. Þann stað tengja kettir við öryggi.

Þó að erfitt sé að lesa í huga katta þá er vel hugsanlegt að ástæðan fyrir því að kettir séu svona hræddir við agúrkur séu liturinn og lögunin. Það er að þeir tengi agúrkuna við snáka, sem hafa verið smáum kattardýrum hættuleg rándýr aftur í aldirnar.

„Það er sennilega ekki gott að valda dýrinu þínu streitu,“ segir Goldman.