Harry Bretaprins er sagður hafa fundið sér „nýja föðurímynd“ í kjölfar mikilla stirðleika í sambandi hans og föður hans, Karls Bretakonungs. Er Harry sagður leita mikið til nágranna síns, Kanadamannsins David Foster sem er margfaldur Grammy-verðlaunahafi.

The Times of London segir frá þessu en í umfjölluninni kemur fram að Harry hafi sést talsvert mikið með Foster sem er nágranni Harry og Meghan í Montecito í Kaliforníu.

Foster er 74 ára, einu ári yngri en Karl Bretakonungur, og er gríðarlega afkastamikill lagahöfundur. Hefur hann samið lög fyrir flytjendur á borð við Celine Dion, Michael Jackson og Whitney Houston svo örfáir séu nefndir. Segir í umfjöllun The Times of London að Foster hafi leikið lykilhlutverk í að aðstoða Harry og fjölskyldu hans við amð koma sér fyrir í Bandaríkjunum.

Eiginkona Fosters er leik- og söngkonan Katharine McPhee og segir hún að samband þeirra Harry og Fosters sé fallegt „eins og hjá feðgum“.