Franska leikkonan Juliette Binoche, forseti Evrópsku kvikmyndaakademíunar, tilkynnti á blaðamannafundi í morgun að Ljósbrot kvikmynd Rúnars Rúnarssonar er á meðal þeirra mynda sem valdar hafa verið til forvals Evrópsku kvikmyndaverðlaunanna. Er þetta enn ein rósin í hnappagatið hjá aðstandendum myndarinnar.

Ljósbrot var í vor opnunarmynd kvikmyndahátíðarinnar í Cannes og hlaut myndin standandi lófaklapp áhorfanda sem og frábæra dóma kvikmyndagagnrýnenda. Til að mynda hafa helstu kvikmyndatímarit heims, Hollywood Reporter og Screendaily, sett Ljósbrot á lista yfir bestu myndirnar á Cannes hátíðinni í ár. Einnig hefur Ljósbrot unnið til fernra alþjóðlegra kvikmyndaverðlauna í sumar.

Ljósbrot verður frumsýnd á Íslandi 28. ágúst og sjá Sambíóin um dreifingu. Með aðalhlutverk fara Elín Hall, Katla Njálsdóttir, Mikael Kaaber,  Baldur Einarsson, Gunnar Kristjánsson og Ágúst Wigum.                                                

Myndin gerist á fallegum vordegi þegar líf Unu snýst á hliðina á svipstundu og upphefst rússibanaferð tilfinninga. Þar sem mörkin milli hláturs og gráturs, fegurðar og sorgar, verða stundum óskýr.

„Þegar saman koma, ótrúlega góður leikarahópur, frábært fagfólk og listafólk, þá geta stórkostlegir hlutir gerst. Við erum ótrúlega stolt af öllu þessu fólki og erum þeim þakklát fyrir að hafa skapað þetta fallega verk með okkur. Jarðvegur sem einkaaðilar og stjórnvöld hafa ræktað undanfarin ár hefur einnig verið ómetanlegur í öllu þessu ferli,“ segir Rúnar.

Nýlega var einnig tilkynnt að O (Hringur) einnig eftir Rúnar hefði verið valin í keppni stuttmynda á hinni virtu kvikmyndahátíð í Feneyjum sem fer fram í byrjun september. Ljósbrot og O (Hringur) voru auk þess í síðustu viku valdar á alþjóðlegu kvikmyndahátíðina í Toronto, sem er stærsta og ein mikilvægasta kvikmyndahátíðin vestanhafs.